Rokstu sagataveja: portals lakuga.lv

2. martā pyrmū reizi Latvejis viesturē tiks atzeimuota Nacionalūs partizanu bruņuotuos pretuošonuos atceris dīna. Tamā Bolvu nūvoda pošvaļdeiba organizej vairuokus pasuokumus, tymā skaitā ari rekonstruātuo bunkura-bazneicys i pīminis zeimis Stompakūs paglobuotajim nacionalajim partizanim atkluošonu, informej Bolvu nūvoda puorstuove Iluta Jaunžeikare.

Atceris dīna suoksīs ar svineigu zīdu nūlikšonu Bolvūs pi pīminekļa Latgolys partizanu pulka krytušajim karaveirim. 11.30 stuņdēs Bolvu Kulturys i atpyutys centrā nūtiks diskuseja “Stompaku nacionālo partizānu nometne kā patriotisma simbols un vietas potenciāls nākotnē”. Diskusejā pīsadaleis:  zemkūpeibys ministrs Kaspars Gerhards, aizsardzeibys ministrs Artis Pabriks, tīslītu ministrs Jānis Bordāns, Bolvu nūvoda pošvaļdeibys dūmis prīšksādātuojs Sergejs Maksimovs, Bolvu nūvoda dūmis deputats Aldis Bukšs, AS “Latvijas valsts meži” Zīmeļlatgolys regiona Mežkūpeibys vadeituojs Viktors Reblis, viesturnīks Zigmārs Turčinskis, jaunsorgu puorstuovs Valentīns Keišs. Diskuseju vadeis Mārtiņš Kaprāns i tū byus vareiba vērtīs tīšraidē Bolvu nūvoda pošvaļdeibys sātys lopā voi Facebook lopā.

Dīnys ūtrajā pusē Stompaku nūmetnis teritorejā Bolvu nūvoda Susaju pogostā byus svātbreids i svineigs pasuokums, kuruo laikā tiks atkluots rekonstruātais bunkurs-bazneica, kai ari pīminis zeime Stompakūs paglobuotajim nacionalajim partizanim. Bunkura-bazneicys rekonstrukceja tyka suokta 2021. godā, pasasokūt Zemkūpeibys ministrejis i “Latvijas valsts meži” atbolstam.

Par Nacionalūs partizanu bruņuotuos pretuošonuos atceris dīnu ir nūsaceits 2. marts, partū ka 1945. goda 2. martā Viļakys (bejušuo Abrinis) apriņča Stompaku pūra soluos nūtyka leluokuo kauja Latvejis nacionalūs partizanu kara viesturē. Tūreiz ap 350 Latgolys mežabruoļu izceineja gryutu kauju ar uzbryukūšuo čekys karaspāka skaitliskū puorspāku, palīkūt nasakauti i, organizāti atsakuopūt, izavaireja nu draudūšuo aplankuma i papyldu zaudiejumu.

Bazneicys bunkurs apmetnē tyka izcalts, kod 1945. goda februarī tamā īsaroda Škilbānu katuoļu draudzis pravests Ludvigs Štagars. Bazneicys bunkurā kotru dīnu nūtyka dīvkolpuojumi. Stompaku kaujis laikā tamā atsaroda mediciniskuos paleidzeibys punkts.

Dobys līgums “Stompaku purvi” ir unikala teritoreja ar dobys boguoteibom i kulturviesturiskū montuojumu. Pūra austrumu dalis soluos 2. pasauļa kara laikā beja īreikuota partizanu apmetne, kurei beja leluokuo Baltejā i Zīmeļeiropā. Tamā beja 24 bunkuri i vairuokys vierszemis byuvis. Iz nacionalūs partizanu apmetni dobys līgumā “Stompaku purvi” vad markāta styga, mytruokajuos pūra vītuos īreikuotys laipys. Izstaigojūt dobys stygu, var izzynuot ari par teritorejā dzeivojūšajim putynim, dzeivinīkim i augim.