Rokstu sagataveja: portals lakuga.lv

Laikā, kod vyss pasauļs, elpu aizgivs, šausmuos i naizpratnē sekoj leidza nūtikšonom Ukrainā, eisti nasagryb dūmuot ni par kū cytu. Portala lakuga.lv redakceja itūnedeļ viņ gryb atguodynuot, kur i kai var paleidzēt finansiali, ar dorbim i koč dūmom atbaļsteit ukraiņus. Taipat kai medeju puorstuovi aicynojam izviertēt olūtu, nu kurūs jemit informaceju i dolatīs iz prīšku, tycameibu, informacejis saturu i korektumu.

Ukrainys cylvākim

Par reizi piec Krīvejis uzbrukuma suokšonuos Ukrainai, 24. februarī, lobdareibys organizaceja “Ziedot.lv” sataiseja zīduojumu kontu, kurā kotrys var pazīduot kaidu sumu mierkim, kurī paleidzēs Ukrainai nūsaturēt i piečuok ari atsakūpt.

Portals aicynoj turpynuot zīduot, jo lels atbolsts byus vajadzeigs kai niu, tai i piečuok. Niu pazīduotuo nauda jau teik izmontuota, kab sadarbeibā ar Aizsardzeibys ministreju pīguoduotu Ukrainai dizeļdegvīlu i pyrmuos vajadzeibys precis.

Pazīduot var ITE voi ari zvonūt iz lobdareibys teleponu 90006086 (vīns zvons 1,42 €).

Nu Ukrainys iz Latveju

Kars dīvamžāļ īt kūpā ar biegšonu paceli nu kara darbeibys zonys, deļtuo Latveja ir gotova uzjimt ari Ukrainys biegļus. Ir sataiseita centralizātys paleidzeibys lopa https://www.ukraine-latvia.com/, kurā kotrys individuali voi kai uzjāmums var pīsasaceit paleigūs taidā veidā, kaidā ir īspiejis – izmytynuot Ukrainys ļauds, paleidzēt ar transportu voi pīduovuot humanitarū paleidzeibu ari vesšonai iz Ukrainu. Navaļstiskuos organizacejis i ministrejis lyudz byut koordinātim i vysim paleidzēt grybātuojim izmontuot lopā asūšuos anketys paleidzeibys pīduovuošonai.

Atbolsta nūtikšonys

Ari Latgolys pošvaļdeibys īsasaista Ukrainys atbalsteišonā kai viņ var, pīduovojūt izmytynuošonys īspiejis, atbolstūt paleidzeibys organizacejis i paužūt ari nūsūdejumu Krīvejis reiceibai. Ukrainys i ukraiņu atbolsta nūtikšonys jau ir aizvadeitys kai Rēzeknē, tai Daugovpilī, Bolvu nūvoda Upītē i cytur. Latvejis Pošvaļdeibu savīneiba aicynuojuse vysys Latvejis pošvaļdeibys 2. martā 18.00 apsavīnuot vīnlaiceigā atbolsta nūtikšonā, izsokūt solidaritati Ukrainai. Itymā laikā atbolsta akcejis paradzātys ari Rēzeknē, Preiļūs, Bolvūs, Ludzā, Leivuonā, Špogūs i cytur. Ka kaids dūmoj, kai itaids pasuokums var paleidzēt Ukrainai, sevkura vīdūkļa pausšona ir atbolsts i reizē tei ir ari sovejūs podturiešona tepat, iz vītys, rodūt sajiutu, ka vysi puordzeivuojumi ir kūpeigi i pīveicami.

#ĪsastuotParUkrainu volūdā

Volūdneica, tulkuošonys eksperte i pasnīdzieja Aiga Veckalne (instagram konts @pieturzimes) aktualizej sabīdreibā vaicuojumu par īkļaunūšū volūdu, aicynojūt nadiskriminēt kaidu sabīdreibys daļu ari ar vuordu izvieli tekstūs. Ari itys kars Ukrainā aktualizējs situaceju par Ukrainys vītvuordu atveidi, kas mums ir dareita nu krīvu volūdys. Īsastuojūt par Ukrainu, volūdnīki i ari Ukrainys viestnīceiba īsoka latvīšu literarajā volūdā lītuot itaidys vītvuordu formys, par pīmāru, Ļviva (na Ļvova), Harkiva (na Harkova) i Kijiva (na Kijeva). Aiga soka, ka ari tys ir veids kai byut solidarim – tū sauc par lingvistiskū empateju.

Ukraina kab skaņ kotrā sātā

Muzykys žurnalisti i cyti muzykys kūpīnys aktivisti Baltejis vaļstīs ir sataisejuši muzykys sarokstu #StandByUkraine, kab kotrys varātu itai atbaļsteit naviņ Ukrainys muziķus, bet ari kūpumā simboliski paruodeit atbolstu Ukrainai. Gondreiž treis stuņžu garais 45 dzīšmu saroksts ar dzīsmem nu “DakhaBrakha”, “Okean Elzy”, Jamala, Ivan Dorn, “5’nizza”, ONUKA i cytim var skanēt kotrā sātā!

Reitu Aizgavieņs i kai reizi pasatruopeja Andra Vējāna ryndys nu dzejūļa “Sovaids laiks”:

Kaidu Kaļvarejas kolnu
vēļ esi mums liemis
Tu — mīlesteibas un suopu laiks
storp Zīmyssvātkim un Aizgavieni?

Nui, taids sovaids mīlesteibys i suopu laiks. Kaids mīļoj sovu zemi, kaids cyts tū suopynoj. Kab styprys gors i slave Ukrainai!