Rokstu sagataveja: portals lakuga.lv

17. martā 17.00 stuņdēs Latvejis Kulturys akademejis (LKA) Teatra sātā “Zirgu pasts” nūtiks profesora, arheologa Jura Urtāna gruomotys “Jaunatklātie pilskalni Latvijā. 1998.–2021.” attaiseišonys svātki, viestej informaceja LKA sātyslopā. Izdavumā apkūpuotys zinis par 86 piļskolnim, leluokuo daļa nu tūs atsarūn Latgolā.

Leluokuo daļa nu itūs 86 piļskolnu atkluoti beidzamajūs četrūs godūs, kai publiski daīmami ir LIDAR (Light Detection And Ranging) dati. Apjūmeigū izdavumu boguotynoj jaunatkluotūs piļskolnu fotografejis, kartis, reljefa vizualizacejis i 3D modeli. Gruomotys prezentaceju byus vareiba vērtīs ari tīšsaistē, Latvejis Kulturys akademejis Facebook lopā.

Jurs Urtāns Latveju sauc par piļskolnu zemi: “Piļskolni ir vizuali vysnūzeimeiguokais Latvejis arheologiskūs pīminekļu veids, kam ir na tik zynuotniskuo atslāga nūzeime kai arheologiskajim izpietis objektim, bet ari nūzeime lokaluos identitatis i nacionaluos pošapzinis veiduošonā, tuos atteisteibā i styprynuošonā, kulturviesturiskajā ainovā i turisma produktu veiduošonā. Beidzamajūs četrūs godūs, pasasokūt publiski daīmamim aerolazerskeniešonys datim, ir nūtykuse spruodzīņveideiga piļskolnu jaunatkluošona – atkluots apmāram tikpat daudz jaunu piļskolnu, cik īprīškejūs 70 godūs. Itei gruomota veļteita jaunatkluotajim piļskolnim, kai turpynojūt īprīškejūs pietnīku izveiduotū piļskolnu publiciešonys tradiceju, tai īvodūt zynuotniskā apritē jaunus, īprīšk nazynamus Latvejis piļskolnus. Kab saglobuotu saikni ar īprīšk publicātajom piļskolnu apkūpuojuma gruomotom, itymā izdavumā īkļauti ari tī nadaudzī piļskolni, kas beja jaunatkluoti jau pyrma LIDAR erys suoku”.   

Gruomota izdūta ar Latvejis Zynuotnis padūmis atbolstu projekta “Pilskalnu jaunatklājumi Latvijā 2018.–2021.gadā: kultūrvēsturiskā nozīmība” (Nr. lzp-2020/2-0078) ītvorūs. Gruomota sevkuram interesentam byus daīmama Latvejis leluokajūs gruomotu veikalūs.

Portala Lakuga.lv pārņ sagataveitū sarunu ar arheologu Juri Urtānu var skaiteit ITE.

14. martā gruomotys attaiseišonys nūtikšonys īvadeja Jura Urtāna tīšsaistis lekceja “Pilskalnu jaunatklāšana. Mācības un pārdomas”: