Rokstu sagataveja: portals lakuga.lv

Pīktdiņ, 18. martā, 16.00 stuņdēs Daugovpiļs Marka Rotko muokslys centrā nūtiks izstuodis “Atrasts kolekcijā” kataloga attaiseišonys svātki, informej muokslys centra puorstuovs Aivars Baranovskis.

Izstuode “Atrasts kolekcijā” ir leluokais Daugovpiļs Marka Rotko muokslys centra kruojuma izstuožu projekts. Tys reprezentej muokslys i kulturys vierteibys, kas uzkruotys deveņu godu laikā, i līcynoj par aktivu muokslys centra darbeibu. Izstuode ir kai muokslys centra dīnysgruomota – stuosti par simpozeju i izstuožu nūtikšonu, līceibys par komunikaceju i sadarbeibu muokslys projektu eistynuošonā, dialogi i monologi par muokslys procesu vierzeibu i atteisteibu, kur nūteicūšuo lūma ir cylvākam – muokslinīkam, kuratoram, kolekcejis veiduotuojam.

Katalogs apvīnoj izstuodē eksponātūs Latvejis (ari taidu Latgolys muokslinīku kai Leonīds Baulins, Valdis Bušs, Silva Linarte, Pēteris Martinsons, Valda Mežbārde, Ilona Linarte-Ruža, Lilija Zeiļa, Osvalds Zvejsalnieks) i uorvaļstu muokslinīku dorbus nu Rotko centra plašuos i muokslinīciski augstvierteiguos kolekcejis, kas itūšaļt sastuov nu gondreiž treis tyukstūšu muokslys dorbu dažaidūs medejūs. Aplīcynojūt nagaistūšu saikni storp muokslys dorbu i tuo radeituoju, katalogu papyldynoj muokslinīku rodūšuo dzeivis guojuma i muokslinīcyskuo rūkroksta aproksti.

“Atrasts kolekcijā” ir pyrmais izdavums, kas atspīgeļoj izcileibys Rotko centra kolekcejā. Tys akcentej kotra katalogā īkļautuo muokslinīka eipašū saikni ar muokslys centru i kotra muokslys dorba nūzeimeigumu Rotko centra veiduošonuos, atteisteibys i pastuoviešonys laikā. Katalogs ari pamat intrigu kolekcejis izpietei iz prīšku, partū ka tei ir vēļ daudzu muokslinīcysku puorsteigumu pylna i niu veidojās par nūzeimeiguokū muokslys kruotivi Latgolā.

Pīktdiņ, 18. martā, 16.00 stuņdēs nūtiks kataloga “Atrasts kolekcijā” attaiseišonys svātki, kam pīsavīnuos izstuodē i katalogā puorstuovātī muokslinīki i Daugovpiļs Marka Rotko muokslys centra kolekcejis veiduotuoji. Itim svātkim teik aicynuoti pīsavīnuot daugovpilīši i piļsātys gosti, kam svareigi rodūšī procesi Latgolys regionā.

Izstuodis i izdavuma projekts ir vēļ vīns sūļs Daugovpiļs ceļā iz Eiropys kulturys golvyspiļsātys 2027 statusa dabuošonu.

Atguodynojam, ka Daugovpiļs Marka Rotko centrs pavysam naseņ sajēme Latvejis sabīdryskūs medeju goda bolvu kulturā “Kilograms kultūras 2021” kai goda kulturvīta.