Rokstu sagataveja: portals lakuga.lv

24. martā 15.00 stuņdēs Daugovpiļs Marka Rotko muokslys centrā byus muokslineicys Agrys Ritinis personalizstuodis “Kronis” kataloga attaiseišonys svātki, viestej informaceja centra Facebook lopā. Tei byus unikala vareiba sasatikt ar muokslineicu i uzklauseit tū, kai Agra Ritiņa poša stuosta par sovim dorbim.

Pastozi i jaušami liriski, sīviškeigi, tok stabili izsvārti i reizē monumentali lakoniski i estetiski teiri – taidi ir kompoziceju laukumi Agrys Ritinis daiļradē. Taidus tūs radzam, atsaverūt iz dorbim, kuri radeiti agruok, palykuši darbneicā voi seņ jau prīcynoj jaunūs saiminīkus cytuos sātuos. I taidi tī pasaruoda ari gleznuotuojis jaunuokūs dorbu kūpumā, kurs apsaverams izstuodē “Kronis” Daugovpiļs Marka Rotko muokslys centrā. 

Agra sovā gleznīceibā īīt nu dobys nūtikšonu fiksacejis i palīk dobai uzticeiga, giunūt tamā īdvasmu, kruosu i gaismu attīceibu spēlis, nūskaņu, formu i saturu, transformejūt radzātū, definejūt sev byutiskū i veidojūt maudojūšū, šaļtim zamu sleigstūšū muokuļu studejis kai nabeidzamus krūņus.

Agrys Ritinis izstuode “Kronis” ir daļa nu Rotko centra zīmys izstuožu sezonys, kurā da 10. apreļa apsaverami pīci cīši atškireigi izstuožu projekti, kas apvīnoj Latvejis, Leitovys, Igaunejis i Vuocejis muokslinīkus.

24. marta pasuokuma laikā izstuodis apmekliejums byus bez moksys, kluotyn pi tuo kotrs varēs dabuot sovā eipašumā Agrys Ritinis izstuodis kataloga eksemplaru.

Foto īsavieršona Agrys Ritinis izstuodē Daugovpiļs Marka Rotko muokslys centrā, foto Edeite Husare/lakuga.lv