Rokstu sagataveja: portals lakuga.lv

Catūrtdiņ, 31. martā 15.00 stuņdēs Latgolys Kulturviesturis muzejā (Atbreivuošonys alejā 102, Rēzeknē) beja paradzāts tematisks pasuokums “Zudusī Rēzekne”. Tymā byutu vareiba virtuali izstaiguot taidu piļsātu, kaida tei nav jau gondreiž 80 godu. Dīvamžāļ muzeja specialista slimeibys dieļ pasuokums puorcalts iz nanūteiktu laiku.

Latgola godu symtu laikā ir pīdzeivuojuse vysaidus viesturis periodus – kai strauju atteisteibu, tai stagnaceju, kai ari pūstūšus kara godus.

Ari Rēzeknis viesture boguota ar daudzom paguotnis nūtikšonom i vysaiduokim kulturviesturiskim objektim. Šudiņ, staigojūt pa piļsātys īlom i īsaklausūt viesturis sūļūs, tik “gora acim” radzam tū daļu nu Rēzeknis, kuruos vaira nav – “laika zūba” atstuotūs pādus, pagaisynuotū sakralū montuojumu, kara nūpūsteituos sabīdryskuos ceļtnis, cylvāku nasaimnīcyskuos reiceibys i ideologiskuos puorlīceibys sakys i tt.

Pasuokumā kūpā ar Latgolys Kulturviesturis muzeja specialistu kulturviesturis vaicuojumūs Kasparu Strodu varēs virtuali izstaiguot Rēzeknis īlys i īsavērt tuos pagaisynuotajā kulturviesturiskajā montuojumā, izzynuot, kai laika gaitā naatgrīzeniski puorsamejuši piļsātys vaibsti.  

Kai stuosta Kaspars Strods, pasuokumā vyslobuok varēs īpazeit divejis centraluos Rēzeknis īlys – Atbreivuošonys aleju i Latgolys īlu. Nadaudz varēs īpazeit ari cytus objektus, tok, saprūtams, vīnys lekcejis laikā navar virtuali izstaiguot vysu piļsātu. “Tuos byus gon sakraluos celtnis, gon sabīdryskuos ākys, tiergs, kas piļneigi atsaškir nu myusu dīnu. Tam, deļkuo piļsāta izaver taida, kaida jei niu ir, pamatā ir gondreiž 80 godu senejis nūtikšonys. Daudz kū asam pagaisynuojuši kara dieļ, dīvamžāļ tys ari niu ir aktuali Ukrainā. Vaira runojam par cylvākresursu zaudiejumiem, bet ari piļsātvide krasi mainuos. Itymā pasuokumā varēs pasavērt, kaida nazkod beja Rēzekne, ari iz tū, kam mes kasdīnā cīši bīži staigojam garum, bet napamonam,” tai Kaspars.

Puormainis pīdzeivuojušys na tik īlys i ākys, bet ari īlu nūsaukumi. Ari par tū tikšūt runuots pasuokumā. Kai izaruod, Latgolys īlai viesturis gaitā puorsamejuši apmāram 7–8 nūsaukumi.

Īīšona pasuokumā – bez moksys, tok ar dereigim kovida vakcinacejis voi puorslymuošonys sertifikatim i paruodūt personu aplīcynojūšu dokumentu.