Rokstu sagataveja: portals lakuga.lv

Svātdiņ, 3. aprelī, Daugovpilī nūtiks guojīņs-sapuļce “Latvija atbalsta Ukrainu”, informej tuo organizatore Inga Jākobsone. Guojīņa suokums byus 15.30 stuņdēs, tuo maršruts paradzāts nu dzeļžaceļa stacejis pa Reigys īlu da Vīneibys laukuma, kur vysus dalinīkus uzrunuos Latgolā zynomi Latvejis patrioti.

Kars Ukrainā ir lics aizadūmuot mums vysim par nūzeimeigom vierteibom – sirdsgudreibu, sapratni, cīnu i leidzdaleibu. Ar Ata Kronvalda saceitū, ka “ar savīnuotim spākim īspiej ari tī mozenī breinumdaudz”, guojīņa organizatori aicynoj sevkuru interesentu pīsavīnuot leluokajom pasauļa piļsātom, kuruos jau izsacejušys atbolstu Ukrainai pret Putina kontrolātū okupantu karaspāku.

Pasuokuma iniciators Ģirts Kalniņš soka: “Kod vysa Latvejis viereiba ir pīvārsta karam Ukrainā, mums ir juoturpynoj atbaļsteit Ukrainu vysūs īspiejamūs veidūs. Taipat mums sev ir juoatguodynoj, ka nacejis vīnuoteiba, atbolsta placs sovejim tepat Latvejā ir na mozuok nūzeimeigs uzdavums. Reigā jau izsacejom sovu nūstuoju, i niu ir daguojs laiks byut Latvejis ūtrajā leluokajā piļsātā, partū sasateikom svātdiņ Daugovpilī. Mes asam gotovi atbolsta pasuokumus turpynuot organizēt kūpā ari ar cytom Latvejis piļsātom.”  

Guojīņa organizatori aicynoj vysus Zemgalis, Vydzemis, Kūrzemis i Latgolys dzeivuotuojus svātdiņ, 3. aprelī, dūtīs iz Daugovpili, kab nūsastuoju placu pi placa sūpluok cytim Latvejis dzeivuotuojim i paruodeitu myusu vaļsts kūpā byušonys spāku, kab atbaļsteitu ukraiņus, kuri dzeivoj voi īsaroduši Latvejā, kab izruodeitu cīnu tim, kuri niu ir gotovi atdūt sovu dzeiveibu, aizsorgojūt Ukrainu nu Kremļa armejis ībrukuma. Mes, Latveja, asam skaitliski moza, tok stypra vaļsts. Partū myusu kūpeigais atbolsts ir nūzeimeigs Ukrainai.

Guojīņa dalinīki aicynuoti pi dzeļžaceļa stacejis puļcētīs vidieji 10 minutys pyrma guojīņa suoku. 

Pasuokumu organizej dūmubīdri nu Reigys i Daugovpiļs.

Atguodynojam, ka 3. aprelī 17.00 stuņdēs Daugovpiļs Kulturys pilī nūtiks ari lobdareibys koncerts Ukrainys atbolstam, kū varēs vērtīs ari tīšraidē iz ekrana Vīneibys laukumā. Vaira par koncertu var skaiteit ITE.