Rokstu sagataveja: portals lakuga.lv

4. aprelī Kulturys ministrejā īsnāgts Daugovpiļs gola atlasis dasacejums Eiropys kulturys golvyspiļsātys 2027 konkursam, informej dasacejuma “Daugavpils 2027” izstruodis koordinatore Diāna Soldāne. Tys ir 18 mienešu dorba rezultats, kura izstruodē Daugovpiļs piļsāta sasadorbuoja ar Rēzeknis piļsātu i Augšdaugovys, Bolvu, Kruoslovys, Leivuona, Ludzys, Preiļu i Rēzeknis nūvodim.

Dasacejuma vodūšais motivs ir Lingua Franca: meklēt, radeit, runuot. Tys ir redzīņs par tū, ka muoksla i kultura ir kūpeiguo volūda, kū vajag meklēt i radeit, kuruos golvonuos īzeimis juoīvyn sarunuos, kab rysynuotu myusu dīnu laikmatam rakstureigūs izaicynuojumus. Kūpeiga kulturys volūda ir myusu ceļš dažaidu vidis i socialūs vaicuojumu rysynuošonai, ilgtspieju i īkļaušonu izavielejūt par caurveju vierteibom.

Daugovpiļs programys kūpejū stuostu veidoj pīcys dalis: Pīturzeimis: vītrade piļsātā i dobā; Burti i ziļbis: tylti byušonai iz prīšku; Vuordi: klusums, trūksnis i jāga; Teikumi: es montoju, es nūvierteju, es muoku, es jaunu rodu; Stuosti: es saprūtu tevi. 100 muokslys i kulturys nūtikšonys īsaisteis i kūpā ļaus dorbuotīs ap 1000 muokslinīku nu vysa pasauļa, Eiropys, Latvejis i Latgolys.

Dasacejumu izstruoduoja reiceibys grupa: Diāna Soldāne, dasacejuma izstruodis koordinatore; Māris Čačka, kulturys i muokslys programys muokslinīcyskais vadeituojs; Inga Belousa, ilgtspiejis nūdrūsynuošonys koordinatore; Jorens Dobkevičs, sabīdreibys īsaistis koordinators; Olga Tolmačova, storptautyskuos komunikacejis specialiste; Jelena Dedele, komunikacejis specialiste; Mudīte Kiseļova, regionaluos sadarbeibys koordinatore i Vita Viļevko, izstruodis asistente. Kulturys i muokslys programys kuratori ir Krista Burāne, Mārtiņš Eihe, Mārtiņš Eņģelis, Ieva Johansson, Gundega Laiviņa, Gita Lancere, Valentīns Petjko, Inga Šteimane, Sarmīte Teivāne i Lauma Žubule. Dasacejums izstruoduots cīšā sadarbeibā ar Latgolys pošvaļdeibu kulturys i rodūšuo sektora puorstuovim, sabīdryskajom organizacejom, vaļsts i storptautyskūs īstuožu puorstuovim, kai ari dzeivuotuojim i atbaļsteituojim vysā pasaulī.

Gola atlasis dasacejums tyka veiduots, papyldynojūt, pylnveidojūt i puorstruodojūt prīškatlasis dasacejums, kurs tyka izstruoduots 2021. goda pyrmajā pusē i kura izstruodē dasacejums “Daugavpils 2027” sasadorbuoja ar Vizionaruos kulturys fondu, dūmneicu “Culture Lab” i Latvejis Kulturys akademeju.

Konkursa nuokušais pūsms ir dasacejuma aizstuoviešona – žurejis delegacejis vizeite Daugovpilī 5. majā i dasacejuma prezentaceja 9. majā Reigā. Eiropys kulturys golvyspiļsātys 2027 titula sajiemieja Latvejā tiks paziņuota presis konferencē 10. majā. “Daugavpils 2027” aktivitatem var sekuot sātys lopā www.daugavpils2027.eu i socialajūs teiklūs.