Rokstu sagataveja: portals lakuga.lv

Augšdaugovys nūvoda Vabalis kulturys nomā 24. aprelī nūsarysynuos kasgadejais Tautys muzykantu saīts. Dalinīki teik aicynuoti pīsasaceit leidz 14. apreļam.

Tautys muzykantu saīta mierkis ir veicynuot namaterialuos kulturys montuojuma saglobuošonu i nūdūšonu nuokušuom paaudzem caur tautys muzykantu-vacmeistaru prasmem, kai ari popularizēt plotuokai sabīdreibys daļai latgalīšu tradicionaluos kulturys vierteibys.

Saīta dalinīki ir tautys muzykanti-vacmeistari nu Augšdaugovys i cytu Latgolys nūvodu, tradicionali muzicejūšys grupys, kapelys i individualī muzikanti, kai ari sevkurs interesents, kam pateik tradicionaluo muzyka.

Kai stuosta vīns nu pasuokuma organizatoru i grupys “Laimys muzikanti” dalinīks Artūrs Uškāns: “Beidzūt piec diveju godu pauzis otkon ir vareiba sasatikt kluotīnē. Itymā pasuokumā nateik izmontuota apskaņuošona, vyss nūteik akustiski. Tī ir muzykantu svātki.”

Pyrma pasuokuma teik organizāta ari meistardarbneica, kur kotrys vacmeistars var izstuosteit par tū, kai jis ir suocs spieļuot sovu instrumentu. Meistardarbneicys laikā teik atlaseitys ari divejis dzīsmis, kurys piečuok teik spālātys koncertā.

Pīsasaceišona leidz 14. apreļam, aizpyldūt pīteikuma anketu ITE i syutūt iz kaidu nu e-posta adresem – pavija@inbox.lv, laimas-muzykanti@inbox.lv. Pasuokuma nūlykums daīmams ITE. Vaira informacejis pa teleponim: 65467018, 29457114.