Rokstu sagataveja: portals lakuga.lv

Etnomuzykys grupa “Tautumeitas” izdavuse jaunu albumu, kuram dūts nūsaukums “Skrejceļš” i tymā apkūpuotys 14 dzīsmis. Reizē ar albumu izīt ari grupys videoklips dzīsmei “Rūžiņu duorzeņā”, kas ir veļtejums Ukrainys īdzeivuotuojim, viestej grupys publicātuo informaceja.

Grupys jaunais albums taiseits kūpā ar ilglaiceigū grupys muzykys producentu Reini Sējānu i zvīdru producentu Povelu Olsonu, kurs pyrma tuo struoduojs ari ar grupu “Prāta Vētra”. Albumā “Skrejceļš”, kuruo sajiuta raudzeita radeit taida, kaida rūnās, īsaslādzūt lidmašynys dziniejim šaļti pyrma pasaceļšonys, vydā ir 14 dzīsmis – tuos ir kai jau zynomī singli “Muoseņa”, “Mežā”, “Panama” i cyti, tai ari da ituo nadzierdātys dzīsmis. Albums “Skrejceļš” īsazeimoj ar jaunim muzykys stylim, žanru savīnuojumim, kai ari sovpateigu etnomuzykys “pērļu” paruodeišonu, vīna nu kurūs ir Dignuojā pīraksteituo dzīsme “Mes bejom treis māsinis” ar prīškdzīduotuoju Mildu Bružuku – “Tautumeitu” versejā tei ir dzīsme “Vīna ūtrai”. Albumā vysu dzīšmu vydā ir ari treis latgaliski – jau dzierdātuo i ar Renāru Kauperu īdzīduotuo “Muoseņa”, veļtejums Zīmeļlatgolys teiciejai Marijai Golubovai “Rise Up!”, kai ari veļtejums Ukrainys īdzeivuotuojim “Rūžiņu duorzeņā”.

Dzīsmei “Rūziņu duorziņā”, kurys vuordus sovulaik teikuse Anna Brokāne Kaunatys apleicīnē (pīraksteiti 1930. godā), ir animacejis stylā taiseits videoklips, kurā muokslineica Terēze Talita Rozenblate īvejuse Ukrainys tautys simbolus. Grupys dalineica Asnate Rancāne, stuostūt par dzīsmi, soka: “Mes veļtejam itū dzīsmi tim, kurī itūšaļt puordzeivoj naizsokamys suopis, škirūtīs nu sovu bruoļu i muosu, bārnu i dzeivisbīdru, vacuoku i vacvacuoki, vysim, kurī zaudej sovys sātys i ruoda pīmāru pasauļam, kai aizstuovēt sovu zemi, sovys vierteibys i sovu tautu. Mes apbreinojam ukraiņus.”

Poša albuma “Skrejceļš” dizainu taisejuse Alise Sondore, kurei albuma dizaina davuse vāsmys nu itūšaļt pasaulī aktualuos i myusdīneiguos Āzejis. Myusdīneiguo i viesturyskuo savīnuošonu car muzyku “Tautumeitas” atzeist kai cīši aizraunūšu procesu. Albuma tapšonā pīsadalejuši taidi muziki Stanislavs Judins, Elvijs Lintiņš, Mārtiņš Milevskis, Aleksejs Bahirs, Edgars Zilberts, Renārs Kaupers, Kaspars Ruoga, Ingars Viļums i pošys grupys “Tautumeitas” dalineicys Asnate Rancāne, Aurēlija Rancāne, Laura Marta Līcīte, Ilona Dzērve, Laura Vārpiņa i Gabriēla Zvaigznīte. Albumu “Skrejceļš” CD formatā var nūpierkt ITE.

Ituo gods vosorā grupai planavuota koncertture Japanā, bet vosorys golā, 26. augustā, grupa aicynoj iz sasatikšonu lelajā koncertā “Skrejceļš” Saukrostūs.

Grupa “Tautumeitas” ir vairuoku Latgalīšu kulturys goda bolvu “Boņuks” sajiemiejis. Vīna nu tūs “Boņuks 2020” ari par Aulejis dzīduotuojom veļteitū albumu “Dziesmas no Aulejas”.