Rokstu sagataveja: portals lakuga.lv

Svietejūt Latgolys kongresa dīnys tyvuošonūs, Saļņovys/Rogovkys/Bozovys grupa “Fak’n’turīs” pīduovoj nūsaklauseit dzīsmi ar rogovkīša Pītera Jurciņa vuordim i “Nūpītnuo” muzyku “Ar Reigys morāli”, kas īturāta pankroka stilā.

Dzīsmi ir aranžiejs “Maigais diktators”, bet instrumentu i bolsa īroksts sataiseits soltā februara dīnā Upītē, jaunajā i glaunajā “Bigmaar’s Records” skona īrokstu studejā.

Par jaunū dzīsmi i tuos viestejumu grupys dalinīkim roduos diskuseja Whatsapp, i jī mums pīduovoj nadaudz tamā īsavērt.

Nūpītnais: “Vysod ir bejuse sajiuta, ka Latgolu apdola. Suocūt nu investiceju i beidzūt ar latgalīšu volūdu. Teik puormasts par spieju solidarizētīs, kod nūteik bolsuošona par latgalīšu izpildeituojim. Teik slavāta cylvāku sirsneiba i skaistuo doba. Mes jau patīseibā naprosom daudz, tikai vīnleidzeigu attīksmi i cīnu pret volūdu, kulturu i cylvākim. Gribim realus īsacejumus i padūmus, na tukšu sprīdeliešonu i pavuiceišonu. Deltuo “Ar Reigys morāli iz Rogovku Tu nabrauc!”.
Maigais diktators: “Ari pošim latgalīšim šaltim pīleip “Reigys morāle”, a reidzinīki mādz byut pavysam sakareigi ļauds. Kotrys dzeivoj kai gryb, i pats izavielej ar kaidu morāli. Kotrā ziņā “Reigys morāle” ite dūmuota kai uzpyuteiba, īdūmeiba i cyti populari natykumi.”
Margarita: “Nu jius, div bakalauri, gon jau sasprīssit i saliksit pareizūs vuordus. Es ta pa “prastomu” pasaceitu, apjuojat latgaļus piec kongresa, uzbuozet sovu volūdu, uzskotus, tān saprūtot, ka na tim cylvākim spīdet literaru volūdu vuiceitīs. Aizbraucit da “D-pilei”, tī “školojamī” gaida jau 30 godu. Navar viņ sagaideit.”
Puorejī grupys bīdri, LIR, Uztycamajais adjutants, Puika i tausteņu pavielnīce atsaturēja nu komentaru.