Rokstu sagataveja: portals lakuga.lv

Ituo gods Muzeju naktī Leivuona Stykla i amatnīceibys centrs aizsuoce akceju, aicynojūt ļauds zīduot jim navajadzeigūs nazkodejuos Leivuona stykla fabrikys stykla izstruoduojumus i veiduot Leivuona stykla banku.

Leivuona stykla fabrikys izstruoduojumi aba Leivuona styklys ir nūzeimeiga vierteiba vysā Latvejis kulturtelpys kontekstā. Kai akcentej Leivuona Stykla i amatnīceibys centra vadeituoja Ilze Griezāne, ir cīši svareigi, kab cylvāki apsazynuotu Leivuona stykla vierteibu.

“Gona bīži ir dzierdāts, ka cylvāki teirej sātu i izsvīž navajadzeigūs Leivuona stykla izstruoduojumus, lobuok atdūt tūs mums,” tai Ilze Griezāne.

Leivuona Stykla i amatnīceibys centrā leluokuo stykla izstruoduojumu daļa atsarūn kruojumā, izstuožu zalē radzama labi, ka trešdaļa nu vysu eksponatu. Izstuožu zalē atsarūn vierteiguokī eksponati, cikom tī eksemplari, kuri atsakuortoj, atsarūn paleigkruojumā voi apmainis kruojumā.

Ilze Griezāne ari papyldynoj, ka ir gona daudz vysaidu projektu ideju. Par pīmāru, varbyut koč kod Leivuona Stykla i amatnīceibys centra apmaklātuoji varēs baudeit kokteiļus nu Leivuona stykla fabrikys gluozem. Viņ tys byus īspiejams tod, ka vīnam eksemplaram byus daudz kopeju.

Ka ir gribiešona i vareiba zīduot stykla izstruoduojumus, sasazynoj ar Leivuona Stykla i amatnīceibys centru. Telepons: 65381855, 28603333; e-posts: livanustikls@livani.lv.