Rokstu sagataveja: Beāte Poikāne portalam lakuga.lv

Itūgod nu 14. janvara da 4. februara projekta “Craftways” laikā nūtyka seminaru cyklys interneta vidē “Kopīgais un atšķirīgais kultūrvēsturiskajā mantojumā starp baltiem un slāviem”. Projekts tyka eistynuots ar Latvejis, Leitovys i Boltkrīvejis puorrūbežu sadarbeibys programys leidzfinansiejumu, i tymā pīsadaleja vysu treju vaļstu puorstuovi. Jura Soikana Ludzys muokslys školys sadaļa itymā projektā beja kūka tieļnīceiba, kur golvonuo viereiba tyka pīvārsta krucifiksim.

Muokslys školys direktore Sandra Vuorkale stuosta, ka, saleidzynojūt ar myusu Leitovys sābrim, Latvejā kūka krysti ir daudz vīnkuoršuoki, pat skūpuoki sovā izteiksmis veidā. Niu krucifiksu veiduošonys tradiceja ir pīplokuse. Vysbīžuok tys mūcenis tāls ir koč kur nūpierkts i īstyprynuots, nav daudz taidu meistaru, kas poši izgrīztu i veiduotu Jezus tālu.

Runojūt par bārnu īsaisti, Sandra stuosta, ka suokumā tyka dūmuots, kai itū temu varātu pasnēgt bārnim, kab jim byutu interesanti klauseitīs. Školuotuojam Vjačeslavam rodās dūma, ka bārni varātu sataiseit nalelu krucifiksa kūka nameņu, i tod attīceigi puorejī varātu izveiduot figurenis, kas tymā nameņā dzeivuotu. Vīna muokslys školys audziekne Zīmyssvātkim taisa sovu Betlemi. Meitine veidoj muola figurenis i vysu kū cytu, bet ar nūsacejumu, ka kotru godu tam ir juoizaver cytaižuok.

Piec sarunu cykla tīšsaistē, roduos dūma, ka krucifiksu apzynuošanā varātu īsaisteit ari sabīdreibu, par cik vīns nu projekta uzdavumu beja apzynuot krucifiksus Ludzys nūvodā i izveiduot karti, kas byutu daīmama vītejim dzeivuotuojim, turistim, kai ari gostim. Kartis izstruoduošona ir procesā, i sabīdreiba tymā aktivi īsasaisteja.

Vītnē Facebook tyka izveiduota grupa “Ludzas novada krucifiksi”, kurā sevkurs interesents ir aicynuots daleitīs ar stuostim i karteņom saisteibā ar krucifiksim. “Sevkura davīnuotuo informaceja otkon nu jauna padareis itū krucifiksu stuostu par dzeivu. Cīši interesanti beja tamuos sarunuos, kas nūtyka tīšsaistē, par tū, cik dzeiva ir itei tradiceja, voi tei niu nūteik, i deļkuo tei niule nūteik. Kai saceja prīsters Andris Priede, tei stihiskuo, gareiguo dzeive reiz ir bejuse stypruoka nakai itūšaļt, tod ir interesanti, kai tys ir niu,” tai Sandra Vorkale. 

Svareigi ir ari rast sasaisti storp paaudzem, pīsaistūt vaira cylvāku. Niu grupā ir 53 dalinīki, ir ari cylvāki cīnejamuokā vacumā, kas dorbojās Facebook. Varātu raudzeit īsaisteit ari godūs jaunuokus cylvākus. “Ka jaunī tū lītu kustynoj, tod skaistuokūs godūs asūšī cylvāki byus veļdziejušīs par tū, ka jūs lyugšonys i dzīsmis nabyus bejušys veļteigys… Taidā veidā ari rostūs leluoka sasaiste storp paaudzem. Kab grupa lobuok funkcionej, asmu atvārta padūmim, īcerem i idejom. Pījimsim, tys byutu ituo projekta naparadzātais rezultats, kurš turpynojās. Tam jau ir tei leluokuo vierteiba.”

Vairuoki grupā cylvāki ir īsyutejuši sovus stuostus. Skaistus i aizkustynūšus stuostus ir atsyutejs Zylupis prīsters Vitālijs Filipenoks. Papyldu stuostim teik aicynuots ari uzjimt nalelus video, kaut vīnu minutu ci dažys sekundis garu fiļmiejumu pi krucifiksu, kur nūteik maja dzīduojumi. Tei ir atvārta grupa, kurā vysi teik aicynuoti īsasaisteit – kai jauni, tai godūs vacuoki cylvāki.

Vaicuota par perspektivom iz prīšku, Sandra Vorkale pastreipoj, ka byutu labi, ka krystim, kurim ir eipaša muokslinīciskuo ci viesturiskuo vierteiba, tiktu pīškierta aizsardzeiba. Nu vairs reši kur ir autentiskī, senejī kūkgrīzumi Jezus tālā, deļtuo tūs, kas palykušs, ir eipaši juopasorgoj. Ir bejuši ari taidi krucifiksi, kurus lyudze kartē nalikt, aiz tuo apsvāruma, ka nivīns tūs nasorgoj. Leidz ar tū vairums krystu, kurim ir lela kulturviesturiska vierteiba, tai ari napasaruodeis kartē. Varbyut kaidam rostūs interese atjaunuot kaidu nu kartē īkļautajim krucifiksim. Tys varātu byut sevkurs cylvāks, par pīmāru, kaidys profesionaluos školys audziekni, kuri nūsadarboj ar kūktieļnīceibu. Itūšaļt vīns Ludzys muokslys školys audzieknis rauga sataiseit krucifiksu.

Projekta laikā veļ ir planavuots nūfiļmēt treis sižetus – par pošu projektu, kūktieļnīku Ontonu Rancānu nu Makašānu i Zylupis prīsteri Vitāliju Filipenoku, kurs pats taisa krucifiksus.

Krucifiksu apzynuošonys akceja vys vēļ turpynojās. Kotrys interesents var dūt sovu īguļdejumu tradicejis apzynuošonā i saglobuošonā iz prīšku.