Rokstu sagataveja: portals lakuga.lv

Vuiceibu gods tyvojās beigom, deļtuo ituos reizis kulturys īsacejumus aicynuojam sagatavuot Bolvu Muokslys školys školuotuojai Līgai Bulei. Līga itūšaļt ir ari muokslys školys izstuožu kuratore. Pa koč kaidu laika strēči Līga paspiej ari sakuortuot lītvedeibu Bolvu Centralajā bibliotekā i byut par školuotuoju Bolvu Bārnu i jaunīšu centrā, kur kūpā ar bārnim īpazeist grafiskūs zeimiejumus, kuri teik realizāti, apdrukojūt krekleņus. Sevi Līga raksturoj cīši vīnkuorši – asmu rodūšs cylvāks.

Vītys, kū apsavērt, i lītys, kū padareit, juovaicoj piec sova īškejuo bolsa sajiutu. Kotra vīta, kuru tu apsaver, tevi ari pīpylda. Tev vysod ir izviele, ar kū sevi boguotynuot i ari kasdīnys steigā i aizjimteibā var atrast koč kū skaistu.
Kasdīnā struodoju vairuokuos ar kulturu saisteituos īstuodēs i piec byuteibys asmu rodūšs cylvāks. Itei nedeļa maņ byus puorjimta ar sajiutom, kas saisteitys ar vuiceibu goda beigom. Vīnys lītys nūsaslādz, jaunys izjiutys dzymst.

Pastaiga Bolvūs ar pīturu rodūšajā kvartalā
Bolvi nav lela piļsāta, tok zaļa i šmuka. Nalela pastaiga var vest nu azara krosta iz skveru. Ej apsavērt strūklaku “Bolvu iudiņsrūze” i tod pīstuoj rodūšajā kvartalā, kur atsarūn uora biblioteka ar zviļnim. Uora bibliotekā var atrast vysaida satura gruomotys. Pajem vīnu, atsaguļ zviļnī i pīpyldi sevi ar burtim, vuordim, mīru, zylim dabasim i putynu čalom.

Prīca acim izstuodē
Vēļ pādejū maja nedeļu ir vareiba Bolvu Muokslys školā apsavērt Agrys Ritinis izstuodi “Meža actiņas.” Izstuode ir boguota ar kruosu niansem i īvad cytā pasaulī. Kai Muokslys školys izstuožu kuratore varu saceit, ka itei nav vīneiguo izstuode, kuru ir vārts apsavērt, tok tei ir boguoteiguokuo i kruošņuokuo nūtikšona ituo vuiceibu goda laikā.

Rodūšais festivals
30. majā Bolvu parkā nūtiks bārnu rodūšais festivals “Ieskandinām pavasari.” Vysai ilgu periodu mes vysi bejom nūlykti iz pauzis – bez mieginuojumu, koncertu i kūpā byušonys. Itamā dīnā byus prīca dzierdēt bārnu gavilis i bolsus, redzēt doncojam tautys dejis i myusu dīnu sūļus. Nūzeimeigai, ka itūgod festivalā byus ari folklorys puorstuovi.