Rokstu sagataveja: portals lakuga.lv

Trešdiņ, 1. junī, Bolvu nūvodā ar pīminis pasuokumu 110. jubilejā tiks gūdynuots literaturys i kulturys viesturnīks, volūdnīks i publicists Mikelis Bukšs (1912–1977), vīns nu īvārojamuokūs latgalīšu (latgaļu) trimdys kulturys darbinīku. Ar pīminis šaļti i bārnu folklorys kūpu i kapelu koncertu Bukšs tiks gūdynuots sovā dzymtajā pusē – Škilbānu pogosta Plešovys cīmā, portalu lakuga.lv informej Namaterialuos kulturas montuojuma centra direktors Andris Slišāns.

Īvārojamais latgalīšu (latgaļu) trimdys kulturys darbinīks – literaturys i kulturys viesturinīks, volūdnīks i publicists Mikelis Bukšs dzims 1912. goda 1. junī Bolvu nūvoda Škilbānu pogosta Plešovā. Dzeivuojs i vuicejīs Baļtinovā i Rēzeknē, struoduojs Aglyunā, Rēzeknē i Daugovpilī, bet 1944. godā nūbraucs biegļu gaituos iz Zvīdreju, kur vadejs tuoļuokū dzeivi. Dzeivuodams Zvīdrejā, Bukšs aktivi dorbuojās trimdys sabīdryski politiskajuos organizacejuos, jis bejs vīns nu latgalīšu organizaceju dybynuošonys iniciatoru i vadeituoju. Kai zynuotnīks pietejs latgalīšu kulturys i literaturys viesturi i volūdu, sarakstejs nūzeimeigus pietejumus Latgolys kulturviesturē. Myužeibā nūguojs 1977. godā i paglobuots Stokholmā, iz kopa pastateits pīmini akmiņs ar uzrokstu “Latgolas dvēseles tulks”. Mikeļa Bukša davuma gūdynuošonai pīminekli pastateiti ari Rēzeknē i Plešovā pi dzymtuos sātys.

1. junī Mikeļa Bukša dzimšonys dīna tiks svieteita Bolvu nūvodā – pušdīnis laikā ar sasapuļciešonu pīminis šaļtei Baļtinovys pogosta Merkuzīnis kopūs, kur paglobuoti Bukša dzymdynuotuoji, nu vīnā stuņdē piec pušdīnu Škilbānu pogosta Plešovā pi Bukša dzymtuos sātys, kur byus svātku sasatikšona ar Upītis Baļtinovys, Rekovys, Viļakys i Viduču bārnu folklorys kūpom i kapelom.

Mikeļa Bukša gūdynuošonas pasuokuma organizators Andris Slisāns stuosta: “Maņ nu bierneibas, kod vēļ muocejūs Upītes pamatškolā, Mikeļa Bukša dzimšonas dīna palykuse pīmiņā ar pyrmū breivlaika dīnu, sauli, daņčim i rūtaļom Plešovā. Mes ar vacuokim, Ontonu i Irenu Slišānim, kotru godi 1. junī iz tīni braucem. Tān, izaugūt lelam, maņ ir lapnums, ka dzeivoju tymā pat nūvodā i pogostā, kur dzims izcylais Latgolas zynuotnīks. Deļtuo itūgod svātkus svieteisim kūpā ar nūvoda bārnim.”

Jau februarī, 110 dīnys pyrma jubilejis, suocūt dūmuot par Bukša dzimšonys dīnu i aicynojūt Latgolys kulturys darbinīkus, īstuodis i cytus interesentus pasadaleit ar stuostim i atmiņom par Mikeli Bukšu, internetā akceju #SazavasalojarMikeliBukšu aizsuoce Bolvu Centraluo biblioteka, itūs stuostus publicejūt sovā profilā socialajā teiklā “Facebook”. Akcejis idejas autore, bibliotekys vadeituoja Ruta Cibule soka: “Dūmoju, ka Mikeļs Bukšs šupavasar var justīs laimeigs! Juo i juos dzeivisbīdrinis Janinys Bukšs pīnasumu Latgolys izzynuošonā i latgalīša pošapzinis veiduošonā mes daudzynojam jau 110 dīnys pyrms Mikeļa leluos jubilejis. Izaver, ka asam tykuši par lelu sovejūs pulku, kuri naspiej dzeivuot bez Mikeļa raksteituo vuorda. Deļtuo 1. junī vysi, kuru sirdis dzeivoj Latgolai, teik aicynuoti puļcietīs Merkuzīnes kopūs i Plešovā. Ļustēsim i runuosim par Mikeli!”