Viļānu tierga pīdzimšona i mozūs volūdu boguoteiba – žurnala “A12” stuosti vosorā
Rokstu sagataveja: portals lakuga.lv
Izguojs žurnala “A12” jaunais juņa/juļa numers, kurā sarunys ar bolvys “Lielais Kristaps” sajiemieju grima muokslineicu Aiju Beatu Rjabovsku, folklorys pietneicu Angeliku Juško-Štekeli, Viļānu tierga krysttāvu Juri Tuču i cyti stuosti. Itys numers reizē saīt ari žurnala “A12” sova veida jubilejs – jau 60. numers.
Žurnala redaktore Ināra Groce, īvodūt ituos reizis rokstus, soka: “Jau izdūtajūs 60 numerūs žurnals “A12” viestej par Latgolu i tuos ļaudim. Kai skaiteituoji, tai žurnala varūni ir tykuši atvārtuoki, izaveiduojuse vierteibu skola – skaisti, eistyni, dzili. Žurnals ir bejs līcinīks jaunu kultūrvītu dzimšonai, tam, ka regionā atsagrīž jaunīši i saimis. Vys tik juoatzeist, ka kūpumā myusu palīk arviņ mozuok. Kū nav īsadevs pameit – savīnuot dažaiduos palykušuos cylvāku grupys – sovejūs, myusejūs i cytaiži dūmuojūšūs.”
Juņa/juļa žurnalā “A12” skaitit:
- par kū “sasacap” latgalīši – sacynuojumi piec aizvadeituo Latgolys kongresa;
- balvys “Lielais Kristaps” sajiemiejis grima muokslineicys Aijis Beatys Rjabovskys dorba kasdīna i latgaliskuo identitate;
- ituo gods Latgolys pūdnīku dīnys keramikis Evijis Vasilevskis skatejumā;
- ceļuojums tepat iz Raipoli, laivu braucīni pa Latgalys iudinim i gostūs tuoļuok – iz Sicileju pi veinziņu;
- kotra jauna volūda – myusu boguoteiba, atzeist Pūlejis volūdnīki Nikole Naua i Tomašs Viherkevičs, kurim nav sveša ari latgalīšu volūda;
- vosorys saulgrīžu tradiceju apsazynuošona i tūs kūpšona – saruna ar folklorys pietneicu Angeliku Juško-Štekeli;
- Viļānu tierga aizsuokumi i saruna ar tuo krysttāvu Juri Tuču;
- muzykys stuosts par dirigenti Ivetu Kepuli – kur rūnās i nūder avanturiskais gors, kai ari cyti stuosti.
Kai vysod žurnalā “A12” ari portala lakuga.lv sagataveituo informaceja par jaunumim latgaliskajā muzykā – itūreiz grupys “Tautumeitas” jaunais albums “Skrejceļš” i etnomuzykys izlase “Sviests 9”. Žurnalā var puorskaiteit ari portala komandys gataveituos intervejis – ar Poznanis Oduma Mickeviča universitatis profesorim, volūdnīkim Nikoli Nauu i Tomašu Viherkeviču sasarunuoja portala vadeituoja Edeite Husare, bet lakuga.lv redaktore Laura Melne sasatyka ar grima muokslineicu Aiju Beatu Rjabovsku.
Žurnals “A12” ir vareiba izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Vaira par vareibu abonēt voi nūpierkt (kai digitalā, tai taustomā veidā) žurnalu ite: https://a12.lv.
