Kulturys īsacejumi nedeļai: vosorā iz dzerauni!
Rokstu sagataveja: portals lakuga.lv
Vosora i syltais laiks daudzim nu korstūs dzeivūkļu daspīž izaraut iz laukim – tyvuok dobai, kur var nūsaglobuot pakrieslī, nūsamauduot, pacept gali i paravēt buļbu vogys, lai zīmā byutu kū nūvest iz piļsātu. Foto entuziaste i bīdreibys “LgSC” kulturys aktivitašu organizatore Amanda Anusāne itūvosor vysim īsoka izbaudeit i apsavērt dzeraunis kulturu.
Meklēt pīna goldus
Pīna golds – dzeraunis kulturys pīmineklis voi kai Raibīs tū sauc “pādejais dīva oltors”.
Na tik seņ lauku ainovys papyldynuoja pīna goldi, kurūs iz rūku pierstu pat saskaiteit navarēja. Itūšaļt tūs labi vajag pameklēt. Kotram ūtrajam ir kaida atmiņa voi stuosts par pīna goldu. Vīnam tei beja vīta, kur kotru reitu nest nūdūt pīnu, ūtram – īt piec svaiguokuo avīzis numera. Kaidam pīstuošona ar ritini i pasarunuošona ar sābri, kaidam štabs, iz kura dareit vysaidys blienis, cytam otkon randeņu vīta, kur apsarunuot par dzeivi, mīlesteibu i pasavērt zvaigznēs. Īsoku kotram pajimt ritini i puorkast pa sovu voi aizbraukt iz svešuoku dzerauni, pameklēt pīna goldus i atguoduot sovys atminis par tim. Nūbiļdēt tūs, pošim pi tūs nūsabiļdēt i nūsyuteit biļdis iz pinagolds@gmail.com. Biļdis tiks īvītuotys IG pīna goldu arhivā, vysus pīna goldus var apsavērt Instagramā @pina_golds.
Nūbraukt iz kopim
Papyldu vysim vosorys festivalim navar aizmierst par kopu svātkim aba ospruoteigai tulkojūt iz angļu volūdu “dead people festival”.
Kopu svātku sezona jau rit pylnā sporā, nav šaubu, ka itymūs svātkūs sasateik vysa rodne. Tei ir tei reize, kod sabrauc poši tuoļuokī pīdereigī, lai dzymtys lūkā atguoduotu aizguojušūs. Daudzys kopu vītys, eipaši dziļuokūs nūstyurūs teik sakūptys tik iz kopu svātkim, a vāluok – damierstys. Īsoku vysim na tik aizadūt iz kopim kopu svātkūs, bet nūbraukt ari taipat viņ – nūvest sveceiti i peonejis, izkaplēt nazuolis i pasarunuot ar meilajim, kuri aizguojuši tamā saulē.
Ītusēt ar babom i dzedim
Kotram nūteikti dzeraunē ir kaida babeņa voi dzeds, ka tī nav sovejī, tod sābrūs vys jau kaids nūteikti dzeivoj.
Ka tova vosora ir pīpiļdeita ar vysaidom nūtikšonom, to babom i dzedim dzeraunē eisti nikas nasamaina, tik vaira dorba i pi puorkarsšonys saulē bīžuok golvys reibūni. Ka tovi vacuokī navar aizbraukt izbaudeit kulturu, to tu vari kulturu aizvest da jūs. Sataisi pikniku, kūpā nūdiejit ašņa dasys voi sataisit kļockys, sasīnit Juoņu sīru, īpazeistynoj vacūs ar ŪGU, Latgalīšu Repu, Bruolānu, BezPVN i cytim muzikim, kurūs baba kasdīnā nasaklausa, nūved jim kaidu nu Raibuo “Obrozu” posta kartem, paskaitit puotorus, ka ir mozī, padzīdit kūpā “Rupuču” dzīsmis. Izcylā gadīnī – nuorganizej kaidu akordeonistu. Jī byus cīši laimeigi.
