Rokstu sagataveja: portals lakuga.lv

Itūšaļt nūteik aktivs dorbs, kab jau rudinī skaiteituoju rūkuos tyktu puorizdūtuo 1992. godā izguojušuo vīneiguo povuorgruomota latgaliski “Povōru grōmota”, kurys autore ir Antonina Masiļūne.

1992. gods Latgolys viesturē ir eipašs, nu 11. leidz 13. augustam nūtyka Pyrmais latgalīšu saīts, puļcejūt na tik vītejūs, bet ari uorpus Latvejis dzeivojūšūs latgalīšus. Tyka lamts par latgalīšu volūdys vaicuojumu aktualiziešonu, gruomotu izdūšonu latgaliski, par Rēzeknis Augstškolys izveiduošonu i c. Saīta laikā atkluoja ari atjaunuotū pīminekli “Vienoti Latvijai” aba Latgolys Muoru, kai tys īsaukts tautā. Saguoja ari tai, ka iz saīta laiku izdeve Antoninys Masiļūnis “Povōru grōmotu”.

Pyrmū i da šam vīneigū povuorgruomotu latgalīšu volūdā izdeve 15 000 eksemplarūs. Verūtīs nu myusu dīnu perspektivys, tys ir miļzeigs apjūms, jo niu gruomotys latgalīšu volūdā izīt videji ap 300–700 eksemplarūs. Koč ari sovulaik izguojuse miļzeigā metīnī, niu itei povuorgruomota ir cīši gryuši atrūnama, vys tik interesenti gruomotu var apsavērt Nacionalajā bibliotekā. Vaira par pyrmū izdavumu skaiti portala lakuga.lv rokstā ITE.

Niu piec 30 godu Antoninys Masiļūnys gruomota tiks puorizdūta. Par tū dubults paļdis juosoka Rēzeknis Tehnologeju akademejis docentei Diānai Apelei, kura ir kai pyrmuo izdavuma muokslineica, tai gruomotys puorizdūšonys idejis autore. Goda suokumā tyka īsnāgts dasacejums Rēzeknis Mozūs kulturys i turisma projektu konkursam i piečuok ari sajimts atbolsts gruomotys puorizdūšonai.

Kai stuosta Diāna Apele, jei uzrunuojuse Rēzeknis Tehnologeju akademejis profesionaluo magistra studeju programys “Dizains” studenti Valentīnu Siņakovu, kurai iz tū šaļti vēļ nabeja pīteikta magistra dorba tema. Studente lobpruot pīkrytuse plotuok apsavērt itū temu, leidz ar tū niu tiks na viņ puorizdūta vīneiguo povuorgruomota latgaliski, tok ari byus daīmams padzilinuotuoks puorskots par Antoninys Masiļūnis dzeivi i dorba gaitom. Magistra dorba vajadzeibom tyka īvuokta informaceja par pošu Antoninu, kai ari intervēti juos radinīki. Sovpus par gruomotys volūdys kvalitati ryupejās Maruta Latkovksa. Gruomotu paradzāts izdūt 400 eksemplarūs.

Itūšaļt paradzāts, ka 30. septembrī byus gruomotys prezentaceja Latgolys Kulturviesturis muzejā Rēzeknē, 12. oktobrī – Daugovpiļs tehnikuma Dagdys filialē i novembra beiguos – Rēzeknis tehnikumā.