Rokstu sagataveja: portals lakuga.lv

Piec treis godu dorba bīdreiba “Danču krātuve”, Daugovpiļs folklorys kūpa “Svātra” i Eināra Lipska īrokstu studeja Rēzeknē ir sagatavejuši i izdavuši daņču gruomateņu-albumu “Latgolys daņči i na tik”, kurymā apkūpuoti 20 Latgolys pusē pīraksteitys daņču melodejis i aproksti, portalu lakuga.lv informej bīdeibys “Danču krātuve” puorstuove Ieva Zīlmane.

Izdavums sagataveits obejuos latvīšu volūdys rokstu tradicejuos – kai latvīšu literarajā, tai latgalīšu rokstu volūdā. Gruomateņā atrūnami 20 Latgolys pusē pīraksteitu daņču, par pīmāru, “Dzīsme (Pīci bāri)”, “Doncuot guoju ar meitom”, “Sieņu poļka”, “Viļānu suseklis” i cytu zeimiejumi, notu pīroksti, dzīdamuo teksta pīroksti, kai ari ploti daņču nūtikšonys aproksti. Taipat izdavumu papyldynoj precizi latvīšu deju horeografiskūs pamatu aproksti, kas pyrmū reizi pīraksteiti ari latgaliski. “Struodojūt pi izdavuma, nu pyura skreinis tyka caltys uorā na viņ zynamuokuos melodejis, nu ari mozuok zynomys,” tai “Latgolys daņči i na tik” saturu komeņtej bīdreibys “Danču krātuve” vadeituojs Sandis Zučiks.

Daņču muzyku Eināra Lipska studejā īraksteja Daugovpiļs Vīneibys noma folklorys dzīšmu i deju kūpa “Svātra”, kas klauseituojus i skateituojus ar dzīduošonu i doncuošonu prīcynoj jau nu 1994. goda. Itys ir “Svātrys” trešais albums – pyrma tuo 2008. godā izdūts disks “Lobreiteņ reitā agri”, bet 2013. godā “Seši reiti nedeļā”.

Gruomateņā īkļauti ari vairuoki folklorys kūpys “Svātra” vadeituojis Sarmītis Teivānis pīraksteitī i daudz popularizātī daņči “Jurginu vaļss” i “Mikita”. Par “Jurginu vaļsi” Sarmīte stuosta: “Rūtaļu 1979. godā īruodeja Leiksnys školys tuo laika direktors Antons Škutāns. Vabalis školys pyušamūs instrumentu orkestris vīnu reizi mienesī spieļuoja Leiksnys školā ballis. Mārgys sēdēja vīnā zālis molā, bet puiši – ūtrā. Mārgys pacīteigi gaideja, puiši stumdejuos i kautrejuos aicynuot mārgys iz deju, bet direktors ar itū rūtaļu vysod muoceja lobuot naveiklū situaceju.”

Bīdreibai “Danču krātuve”, kas dorbojās nu 2017. goda, itys ir jau ūtrais itaida veida izdavums ar gruomateņu i albumu, pārņ izdūts “Vidzemes danči un ne tikai”. Vysi daņči, tūs vydā ari folklorys kūpys “Svātra” īdzīduotī, i melodejis atrūnami ari portalā dancukratuve.lv.

Gruomatenis izīšonu atbaļstejs Latvīšu Fonds i Vaļsts kulturkapitala fonds.