Rokstu sagataveja: portals lakuga.lv

Pavasarī Rēzeknis nūvoda pošvaļdeiba izsludynuoja da šam nabejušu aktivitati, kurys mierkis beja pīduovuot leidzfinansiejumu jaunu latgaliskuos ideņtitatis zeimu izveiduošonai nūvoda pogostūs i cīmatūs.

Kab veicynuot latgaliskuos kulturvidis saglobuošonu i atteisteibu iz prīšku Rēzeknis nūvodā, pošvaļdeiba izsludynuoja latgaliskuos ideņtitatis atbolsta programu. Konkursā finansiali tyka atbaļsteita vizualuos ideņtitatis i reklamys materialu veiduošona latgalīšu rokstu volūdā i ar latgalisku simboliku.

Itūšaļt konkurss ir nūsasliedzs, tymā beja īsnāgti seši projekti. Viertiešonys komiseja, izviertejūt vysus īsnāgumus, pīškeire finansiejumu vysim projektim, atbylstūši īsnāgtajom tamem i atbiļsteibai konkursa viersmierkim.

Kai stuosta Rēzeknis nūvoda Kulturys nūdalis vadeituoja Ināra Pleikšne: “Itys beja pyrmais mieginuojums, kod poši raudzejom saprast, kas i kai byus. Gribiejom saprast voi pošim cylvākim byutu interese par taidu aktivitati. Itei reize paruodeja, ka interese ir, deļtam plānojam, ka cytugod otkon byus taida aktivitate, viņ vēļ leluokā mārūgā.”

Atbaļsteitī projekti:

• Vidis stends “Nautranu pogosts”

Tiks izgatavuots vidis stends nu kūka iz kura byus lelformata (2×1,5 metri) Nautrānu pogosta karte ar apdzeivuotūs vītu nūsaukumim, apsavieršonys objektim (kultura i doba), turisma maršrutim, pakolpuojumim i cytu informaceju. Teksts byus latgalīšu volūdā.

• “Maltys apvīneibys pogostūs rokstom latgaliski”

Sūplūk pošvaļdeibys āku nūsaukumu pluoksnem latvīšu volūdā, taida poša veida pluoksnis latgalīšu volūdā aplīcynuos, ka Maltys pogosts ir daļa nu Latgolys i styprynuos vītejūs dzeivuotuoju nacionalū ideņtitati i pošapziņu.

• “Drycani par latgaliskū”

Paradzāts, ka leidz Drycānu pogosta svātkim, kuri nūtiks 5.-7 augustā, izveiduos i pastateis četrys zeimis ar Drycānu uzrokstu latgaliski. Papyldu tam byus divpusejuos (latvyski i latgaliski) nūruodis iz sabīdryskūs āku – školys, bārnuduorza, bibliotekys, pogosta puorvaļdis i kulturys noma.

• Laternu stobu baneri Rogovkā

Tiks izgatavuoti laternu stobu baneri, iz kurūs byus izvītuoti Rēzeknis nūvoda i Nautrānu pogosta logo ar tekstu latgalīšu volūdā. Baneri iz stobim byus izvītuoti vysu laiku, viņ vaļsts svātku laikā tiks puormeiti iz Latvejis vaļsts karūgim. Baneri byus treis veidu ar divpusejū apdruku. Iz vīna banera logo i teksts “Vasals Rēzeknis nūvodā”, iz ūtra – Nautrānu pogosta logo i teksts “Vasals Nautranu pogostā”, iz trešuo banera teksts “Troks voi nu Rogovkys”. 

• “Dadža kūki”

Viļānu dobys draugu radūšuos pietnīceibys centrs “Dadzis” izgatavuos i pastateis informativuos zeimis latgalīšu volūdā pi kūku, kas aug centra teritorejā.

• Lūznovys muižys informativais buklets latgalīšu volūdā

Nu Lūznovys muižys pyrmuo darbeibys goda ir izveiduots informativs izdavums par muižys vareibom i aktivitatem, buklets ir četruos volūduos: latvīšu, angļu, vuocu i krīvu. Da šam bukletam vēļ nabeja puortuolkuots i izdūts latgaliskais variants. Niu ari Lūznovys muižai byus sovs buklets latgaliski.