Rokstu sagataveja: portals lakuga.lv

Rēzeknis nūvoda Nautrānu pogosta Rogovkā aizvadeitys tradicionaluos Pīterdīnys nūtikšonys: pīminis breids Desetnīku kopūs, kur paglobuots rogovkīts Pīters Jurciņš i pasuokums Nautrānu sporta hallē – kulturys nomā, informej pogosta puorstuove Inga Vigule. Taipat zynomi ari P. Jurciņam veļteituo literatu konkursa rezultati. Lobuokūs dorbus dreizumā varēs skaiteit ari portalā Lakuga.lv

Jau 18 godu Rogovkā svietej Pīterdīnu, kas veļteita dzejnīka i publicista Pītera Jurciņa pīmiņai. Itūgod dzejnīkam palyktu 90 godu. Desetnīku kopūs ar sirsneigom dzejis ryndom i breineigom dzīsmem Nautrānu vydsškolys školuotuoji Nellija Žogota, Irēna Rancāne i Ivars Rjabovskis gūdynuoja dzejnīka pīmiņu.

Pīterdīnys turpynuojumā Nautrānu sporta hallē – KN nūtyka koncerts, kurā pīsadaleja Sovvalnīks i veiru kors “Graidi” (dirigents Juoņs Mežinskis), kai ari Literatu konkursa laureatu apbolvuošona.

Tradicionali jau apreļa suokumā tyka izsludynuots literatu konkurss, veļteits P. Jurciņa pīminai, dalinīki varēja īsyuteit dorbus pīcuos kategorejuos: dzeja, proza, skečs voi vīncielīņs, bārnu literatura i latgaliskūs vierteibu paruodeišona sevkura dailliteraturys žanra dorbā. Konkursa moto itūgod beja Pītera Jurciņa vuordi “Var tymsā pakrist redzeigais, bet naredzeigais – gaismā puortapt”.

Konkursā pīsadaleja 13 autori ar 14 dorbim, kuri atbylda četrom nominacejom. Dorbi dramaturgejā dīvamžāl pādejūs godūs nateik īsnāgti. Viertiešonys komiseja aicynuoja iz prīšku raksteit skečus, taipat literaturu pusaudžim i jaunīšim. Konkursa viertiešonys komisejis sastuovā itūgod beja: Veronika Dundure – Latgalīšu volūdys, literaturys un kulturviesturis školuotuoju asociacejis (LVLKŠA) vadeituoja, Nautrānu vydsškolys latvīšu volūdys školuotuoja, Ilga Šuplinska – literaturzynuotneica, sabīdriskuo darbineica i politike, Anna Rancāne – dzejneica, žurnaliste, dramaturge. Viertiešonys komisejai konkursa dorbi tyka dūti ar kuortys numerim. Tik piec tuo, kod tī beja izviertieti i nūskaidruoti nominaceju laureati, tyka atkluoti autori.

Konkursa laureatim duovonys sagatavuoja Rēzeknis nūvoda Nautrānu pogosta puorvaļde, bet specbolvu bārnu literaturā – LVLKŠA. Nominacejā “Bārnu literatura” bolvu sajēme suokumškolys školuotuoja Aelita Andrejeva. Jai bolva ari nominacejā “Latgaliskuos vierteibys”. Nominacejā “Proza” – Rēzeknis Katuoļu vydsškolys 11. klasis škoļneica Klaudija Dembovska. Atzineibys nominacejā “Dzeja” sajēme Aulejis TN kulturys pasuokumu organizatore Ilze Vovka i Vydzemis Augstškolys studeņte Brigita Birkova. Specbolvu nu LVLKŠA par bārnu prozu latgalīšu volūdā sajēme Aelita Andrejeva par stuostu “Luoču zemneicu mads”. Veicynuošonas bolva tyka padūta ari Rykovys Jaunūs literatu kūpai “Dzejis garša” (školuotuoja Iveta Dimzule). Jī beja jaunuokī konkursa daleibnīki (9 leidz 16 godi).

Veiru kors “Graidi” beja sagatavuojs plašu koncertprogramu: latgalīšu autoru dzīsmis, tautys dzīsmis, Pītera Jurcina dzeju, kū skaiteja Oskars Lustiks. Kors i skateituoji sasadzīduoja Latgolai i Nautrānim tik cīši nūzeimeiguos dzīsmēs – “Skaidruo volūda” i “Vuolyudzeite”. Atsakluoja ari jaunys legendys – izaruod, ka dzīsme “Vuolyudzeite” ir veļteita na tik Rogovkai, kai pīrosts skaiteit, bet ari Jurciņa krystameitai, kurai asūt pavuorde Vuolyudze. Ari Sovvaļnīka i Mareka Gusāna repertuarā beja daudzi dzīšmu ar Pītera Jurciņa vuordim.

Pasuokumu finansiali atbaļsteja a/s “Latvijas Valsts meži” i Vaļsts kulturkapitala fonda Latgolys kulturys programma.