Rokstu sagataveja: portals lakuga.lv

Niu ir eistais vosorys pylnbrīds, kod syltais laiks i vosorys boguoteibys juosmeļ pylnom sauvem. Kulturys īsacejumus itai nedeļai pīduovoj Folklorys kūpys “Svātra” vadeituoja Sarmeite Teivāne.

Veidoj sovu dialogu ar i par tradiceju
Nu 6. da 10. juļam vaira nakai 250 folklorys kūpys i etnografiskī ansambli sasatiks storptautyskajā folklorys festivalā “Baltica”. Festivala programa ir plota i daudzveideiga – koncerti, sasadzīduošona, daņči, meistarklasis i darbneicys, folklorys kūpu raņdeni, vakariešonys, sasatikšona ar stuostnīkim i cytys aizraujūšys nūtikšonys kai Reigā, tai vairuokūs Latvejis nūvodūs. Folklorys dzīšmu i deju kūpa “Svātra” jius gaideis Inčukolnā Turaidā i Reigā. Verīs programu ITE.

Līpzīdu laiks
Izbaudi līpu zīdu soldoni reibynūšū smuordu i “uzluodej sovu batereju”. Taišni tān ir eistais laiks, kod itūs zaltainūs zīdeņus īvuokt čajam, skaistumkūpšonai i veseleibai.

Draugu vokors
Izbaudi vosorys syltūs vokorus draugu kompanejā sirsneiguos sarunuos pi gunkura voi ari bezryupeigai uzspielejūt kaidu seņ aizmierstu spēli.