Dzejūļu autors: mygluojs

Sovus jaunuokūs dzejūļus publiciešonai pīduovoj mygluojs – vīns nu tūs latgalīšu autoru, kuri roksta ar pseidonimu, naatkluojūt sovu identitati (Ilzis Spergys pārņ veiduotū interveju ar mygluoju var skaiteit ITE). Par itim dzejūlim mygluojs soka: “Vysvaira mīru atguodoj tod, kod juo nav, taipoš kai soltū zīmu pīmiņ vosorys korstuma viļņūs. Itūreiz mygluojs pīduovoj napalikt piļsātā, izslēgt teleponu i apsavērt juo zīmā vuoktūs kruojumus.”

dvēselis februari
itūgod
atnuoce agri
i napuorguoja
guoja
aizguoja da martam
i otkon apsnygu
“hā! veļc uorā
syltū zīmys kurtku!”
napaspieju
apsolu
apsaļdieju zīdus
sev i apleicejim
mierki augstuokī juoatlīk
vēļ iz vairuokim godim

itamā kuļturā kiulu nadadzynoj
dzeivuošonys vītā pastuov
pasavuoļoj
pīsaceļ pusaizmyguši
i eisti namoz nanūmierst
lānai tik sapyudej zaļmalnipūkaini
izbierst vysys smiļts
i saplyust ar nazkū-na-sovu

šudiņ mani nūtrīce lisapedists
trotuara molā augušuo puče mani breidynova
ar slapņū rūku giunūt pi munu iuzu
es tik skrieju tuoļuok
juopaspiej iz muna švuorbu laikmeta bierem
maņ vāluok stuosteja versejis
gosti runova:
-bezkauņa atsaļuove naatīt
-mošeņ kas nūtyka
-moš jam nu kotla puorvyra zupa
i jis vysu vokoru beja spīsts
siedēt kuknē
-moš nazkur pa celi
nūbāga
aizskrēja aiztecēja aizbāga

patīseibā
maņ pošam prīks
piļsātys skriejīņs maņ jau beja apsarībs
tān varu mīrā cik viņ grybu vuorteitīs
ar sadroguotim kaulim (bet tai, storp myusim runojūt
ar taidim nuokūtnis planim kai maņ
maņ jūs laikam eisti vaira ari
navajadzēs)

vēļme nabyut
naraksteit
naelpuot zīmys gaisu
nagurkšynuot snīgu
nasagaideit pavasari

voi ir iz pasauļa vīta
taidai nebulai
taidam mygluojam?
mygla tok vysod
gols golā
p a š k e i s t

cylvāku izsvīde nu meža
pazudynuot izškeidynuot
metropolē
piļsātā
izgrauzt plauškenis
putekļainī celi
izraibynuot actenis
skuobī leiti
nu juos puori palyka tikai
urbanuos puorsacenis

mežs kurais īguoja piļsātā atnuoce i apieda munys susedkys
kurys dzēre vinčiku kotru catūrtdīni
nūruove plastmasu nu kūku
taktiski svīde snīgu pa jaunīšim
kas gribieja izsaut jau trešū salutu par nedeli
i nūkrytuši jī apauga ar syunom
mežs napamaneja mani
ci nagribieja pamaneit pyrms nav izgrauztys
hruščovkys
deveņstuovu sātys
mežs treniejuos pyrms veikt uzbrukumu austrumu vierzīnī

mežs gryb maņ atjimt teleponu
ci jis myus apēss vīnlaiceigi
e-