Rokstu sagataveja: portals lakuga.lv

Dzīsmineica Laura Bicāne izdavuse dzīsmi latgalīšu i spāņu volūdā “Pequeño mundo” aba “Pasaule moza”, kas ir veļtejums juos veiram Karlosam pīcu godu kuozu jubilejā.

Dzīsmē izskaņ atmiņu stuosts par leitainū kuozu dīnu, ar kuru suocēs Laurys i Karlosa kūpdzeive. Karloss īt no Meksikys, partū lels izaicynuojums, obejim draudzejūtīs, beja attuolums. Ari dzīsmē atskaņ vuordi, ka lidūsta vysod bejuse vīta, kura škir. Nu tai vaira nav – Karloss atīt iz sātu kotru dīnu. Laura ar saimi niu dzeivoj Vuocejā, Bavarejā, audzynoj dālu Larsu, ar muzyku nūsadorbojūt projektveideigai. Jei stuosta, ka vīns nu nuokušūs projektu byušūt dzīsmis vuocu volūdā izdūšona.

Skaņdorbs “Pequeño mundo” aba “Pasaule moza” radeits jau paseņ, tok plašuokai publikai teik atruodeits tik itūgod. Kai īmaslu Laura miņ eistuo producenta mekliejumus. Tī vainaguojušīs panuokumim, muziķu sasatikšonys vītnē soundbetter.com atrūnūt producentu nu Čehejis. Vēļ leluoka prīca Laurai bejuse, izzynojūt, ka producents godim sasadorboj ar spāniski runojūšim muzikim. “Latiniskuo nūts nadreikstēja tryukt itai dzīsmei,” tai soka Laura par jaunū dzīsmi, kas producāta regetona stylā. Tamā dzierdams ari veirīša vokals: Sanly Carrión ir muzikis nu Kubys ar cīši skaneigu, syltu vokalu.

Dzīsmis producenti ir Sanly Carrión i Tomas Jochmann, īroksts veikts, miksāts i masterāts Baracca Records Studio Čehejā. Dzīsmis publicitatis foto dizainu veiduojuse Sanita Mukāne.