Rokstu sagataveja: portals lakuga.lv

Sastdiņ, 23. julī, pusdeveņūs vokorā Ciesīs, muokslys telpā “Mala”, nūtiks apvīneibys “Ausmeņa Records” puorstuovu Ūgys i Bruolāna koncerts. Pi DJ puļts byus Martin Birch. Kai Ūgai, tai Bruolānam itei ir nūtikšonom boguota vosora – ar koncertim, rodūšū darbeibu i jaunom sadarbeibom.

Apvīneibys “Ausmeņa Records” mierkis ir saglobuot hiphopa kulturys originalvierteibys Rēzeknē, Latgolā, i ituos vierteibys ītver ari repu. Beidzamajūs godūs taišni Ūga ir palykuse par vysā Latvejā, na tik Latgolā zynomuokū apvīneibys puorstuovi. Jei ir vīneiguo sīvīte, kura repoj latgaliski i ar gūdu nas Latgolys vuordu pasaulī.

Sovpus Bruolāns puorstuov na tik “Ausmeņa Records”, bet ari leiblu “Avangards” i apvīneibu “MKH41”. Jau kaidu laiku jis turpynoj dorbu pi sova pyrmuo soloalbuma “Bagāža”, kas tūp sadarbeibā ar “MKH41” dalinīku bītmeikeru Jezupu. Kai soka pats Bruolāns, albums jau ir īraksteits, niu palykuse tik tehniskuo daļa.

Taipat Bruolāns kūpā ar labi zynomū latvīšu reperi Nātri itūšaļt īroksta EP “Platforma”, kuru paradzāts publiskuot vosorys beiguos. Jau izlaists pyrmais obeju kūpeigais skaņdorbs “Lava”. Interesanti, ka Bruolāns tymā na tik repoj latvyski, bet ari pīsoka sevi kā Brālēns. Voi tys nūzeimoj, ka jis planavoj vaira pīsavērst repam latvyski, na latgaliski? “Maņ pateik eksperimentēt, deļtam pastuoveigai mieginoju dareit kū ta jaunu. Pamieginuot skaiteit repu latvyski ruodejuos interesanta ideja, deļkam nā?! Brālēns ir Bruolāna latvyskuotuo verseja, bet latgaliskais nikur napagaiss. Dreizumā byus jauni singli i klipi kai latgaliski, tai latviski,” tai Bruolāns.

Sovpus ruodīs, ka Ūga niu ir naapturama aba piļneigi īsakļaun latvīšu repera anša ituos vosorys apzeimiejumā, kas latgaliski skaņ #reperuvosora. Jau viesteits par juos sadarbeibom ar Arturu Skuteli i Shipsea, tok tikū izguojuse ari juos dzīsme “Viejs”, kas radeita kūpā ar apvīneibu “Ave Pohus”.

Ūga stuosta, ka taišni ar grupu “Ave JahBahus”, kuruos daļa niu izveiduojuši pīmynātū “Ave Pohus”, jei 2018. godā Ciesīs, “Malā”, aizvadejuse vīnu nu sovim pyrmajim nūpītnajim koncertim kai repere, izpyldūt puors sovys originaldzīsmis. Aicynuojums tī atsagrīzt jau kai zynomai muokslineicai sajimts vēļ pyrma pandemejis, tok tū saguojs eistynuot tik niu. Īīšonys moksa koncertā Ciesīs – 5 eiro.

Itūvosor vēļ Ūgu varēs dzierdēt na tik Ciesīs, bet ari Rēzeknis piļsātys svātkūs (kūpā ar Bruolānu), Ludzys piļsātys svātkūs, Ūgris piļsātys svātkūs, festivalā Salacgreivys zvejnīku parkā i koncertā Reigā, Nordeķu parkā. Taipat jei uzastuos kūpā ar Shipsea, izpyldūt obeju dzīsmi “Dunka”, na tik Shipsea solokoncertūs Dailis teatrī augusta beiguos, bet ari “Prāta Vētras” koncertūs Valmīrā, Daugovpilī i Reigā, kurūs Shipsea byus kai īsiļdeituojs.