Nautrānu pogosta puorvaļdis izsludynuotuo Pīteram Jurciņam veļteituo literatu konkursā nominacejā “Dzeja” atzineibu sajēme Aulejis tautys noma kulturys pasuokumu organizatore Ilze Vovka. Ar juos dzejūlim pīduovojam īpasazeit ari portala Lakuga.lv skaiteituojim. Vaira par Pīterdīnu Rogovkā var izzynuot ITE.

Dzejūļu autore: Ilze Vovka

Drupeiti reita svaiguma
Puoreiti saulis storu
Nu rosys mirdziešonu
Prīcu nu laksteigolys
Seikšaļteņu pļovu kruosys
Aužu stuovūs smaideidama
Dīnu izaustū kai jūstu
Apleik sirdei sīnu
Puortapuse gaismā
Puori vysam īmu
Dzīduodama tāva sātā
Syltā rudzu volūdā

osoru pērlis i smīkli
reita rosa debesīs zvaigznis
Aulejis naktis i reiti
Latgolys vaiņukā peiti
te ceļa putekļūs pādys
dziļi zam akmiņa īmeitys bādys
ar dzīsmem īt Aulejis sīvys
veiri ar ūzula spāku
azara mežgiņuos zyluos
šyupojās liktini myuži
bazneicys boltajuos sīnuos
pukst svieteibā Aulejis sirds
te sagšu raibu kai dzeive
muotis rūkys līk placūs
te senču gudreibys smeļūs
acīs pasauļam drūši verūs
dzeivis krystceļūs stuojūt
tāva padūms dvēselē skaņ
nameklej pasaulī sātys
sāta ir tī kur rudzpuku zīdūs
Sūplok ar Dīvu īt tova sirds

Aiz pakša rudiņs
Leidz celim dodzūs
Pacieļs pasauli rūkuos
Grybādams ratavuot
Eļsinei kai nūdzeits dorba zyrgs
Izpyuzdams myglys vuolus
Tī īsapyn ogrozdu kryumūs
I giun kreitūšys lopys
Kūda kai babys smierts
Iz ganku muna bierneiba
Gamanei ar siermuot suokušom sumerkom
I sasystim bārnu smīklym
Sūplok luočam ar vīnu aci
I traktoram bez skrytuļu
Nagribeigi i tīkai iz itū pusi
Klyboj vokors
Nazdams dīnys kruosainū nostu
I puors sakoltušu myužu
Kū dasvīst dzeivis gunkurā
Kurš tik mīreigi dag
Seņ nūmyrušā pogolmā

Aizlīgt suopis
Tuos suopis
Kas navaicoj atīt kod var
Tuos minotys stuņdis i dīnys
Kas sirdī dubļainys līn
Aizkavēt suopis
Kuoleņ tu īdegsi
Dabasūs zvaigznis
Guni kas šaļteiti cereibu dūd
Aizmygušuos dīnys sapynūs
Cikom bolta duobula pļova zīd

Izmozgovu rudiņa rosā
Sovu vosorys dzīsmi
Palaižu caur ūzula zorim
Pībieru briukliņu ūgom
Šyupāvu dziernyukļa staipeknī
Solnu kluoju zam kuojom
A dzīsme ar dzērvem
Dabasūs nūguo
Palyka atbaļss
Sorkoni čārmyukšu reiti
Rudiņa vuortūs
Muna saplāstuo sirds

Kas vuica myus
Kai teirom kuojom dubļus brist
Kai boltai svātumu iz rūkom nest
Kai turēt gūdā tāva sātu
Kai muotis guņku tuoļuok aust
Kai leiguot sovā volūdā
I satikt Dīvu leidumā
Kas vuica myus
Kai taisnu vogu dzeit
Kai trejdevinis pučis īpeit vaiņukā
Kai bādu likt zam akmiņa
Kai dzīsmi palaist birztalā
Kai nūīt svešā molā
I vysod atsagrīzt

Dīna sadag gunkurā
Palīk viņ palni
Vokora psaļmi
Skaņ rudiņa bazneicā

Skaņ bārnu smīkli
Boltā pogolmā
Smuordej zīma
Cymdu rokstūs
Kurīs ceplī guņs
Iz golda piparmātru čajs
I niu tik capta maize
Syt stuņdinīks pi sīnys
Apsnygušūs egļu mīrs
Tev acīs
Zīmyssvātki

Sleikst muna vosora
Līpzīdu smuordā
Teira kai osora
Kū muote par bārnu
Nūslauka vokorā