Rokstu sagataveja: portals lakuga.lv

Jau itūmienes Latgolys regionaluos televizejis taiseitajūs ziņu raidejumūs “Runā Latgale”, “Reģionālās televīzijas piedāvā” i “Pieci novadi Latvijā” kanalūs ReTV i TV24 ir īkļauti i iz prīšku byus radzami pīcu minutu gari sižeti latgaliski par Latgolys regiona atteisteibys agenturys, a/s “Latvijas Valsts meži” i Vaļsts kulturkapitala fonda atbaļsteituos Latgolys kulturys programys 2022 projektu konkursa laureatim. Kai informej projekta vadeituoja Ausma Sprukte-Kozule, pyrmais sižets sataiseits par tradicionalū Pīterdīnys svieteišonu Rēzeknis nūvoda Rogovkā.

Ar itū sižetu LRT suokuse projekta “Latgolys kultura = identitate, volūda, jaunrade TV ekranā IV” eistynuošonu, kas byus turpynuojums īprīškejūs treis godus taiseitajim sižetim latgalīšu volūdā. Itamā reizē tiks radeiti 12 sižeti par Latgolys kulturys programys laureatu veikumu, par pīmāru, pusaudžu dīnnakts nūmetni “Sūpluok” tīpat Rogovkā, 6. Storptautyskuo simpozeja “Valdis Bušs” nūtikšonu i tuo nūslāguma izstuodis atkluošonu Viļakā, koncertim, pasuokumim i izdavumim vysaiduos cytuos vītuos Latgolā. Goda beiguos vysi sižeti kūpā ar Latgolys regiona atteisteibys agenturys ekspertu redzīnim byus apkūpuoti treis 24 minutys garūs raidejumūs.

Projekta eipašuo lūma ir taida, ka televizejā nacionalā leiminī izskanēs zinis i raidejumi latgalīšu volūdā i dzeivuotuoji tiks radynuoti pi tuo, ka volūda atsateista i tū var lītuot na tik saimē, bet ari publiskajā telpā. Taipat ari puornūvodnīkim tiks veicynuota izpratne, ka vītejī dzeivuotuoji aktivi latgaliski sasazynoj kasdīnā, kluotyn vēļ sižetu i raidejumu autoris ir žurnalistis, kas pošys īt nu Latgolys i kam dzymtuo volūda ir latgalīšu. LRT žurnalistis regulari aicynoj intervejamūs, vysaidu nūzaru puorstuovus, profesionaļus i vītejūs dzeivuotuojus snēgt intervejis latgaliski, tai saglobojūt volūdys izskaniešonu ari masu medejūs, tok ir svareigi dabuot atbolstu piļneigai sižetu izveidei latgaliski i Latgolys kulturys programa ir vīna nu itaidu vareibu.

LRT taiseitūs sižetus i raidejumu latgalīšu volūdā varēs redzēt dorba dīnuos kanala ReTV vierszemis apraidē raidejumā “Runā Latgale” pussepteņūs vokorā, catūrtdīnēs i svātdīnēs raidejumā “Pieci novadi Latvijā” kanalā TV24, kai ari ReTV kanala interaktivajā apraidē raidejumā “Reģionālās televīzijas piedāvā” ūtardīnēs i catūrtdīnēs. Piec puorraidis vysu sataiseitū materialu varēs atrast LRT sātyslopā, Facebook lopā i YouTube kontā.