Rokstu sagataveja: portals lakuga.lv

Jau itymā nedeļgolā suoksīs festivals “Latgolys vargaņu dīnys”. Itūgod festivals prīcynuos ar četrim koncertim Atašīnē, Krystapilī, Ludzā i Rēzeknē.

Kai stuosta vīna nu festivala organizatoru Guna Kise: “Itūgod vysu četru koncertu koncepts ir koncertmeditaceja, kurā prīsteri ari runuos, byus aizlyugumi i kaids vuords par itūbreid aktualuom temom.” Atašīnis, Krystapiļs i Ludzys bazneicu koncertūs īīšona byus par zīduojumim, cikom Rēzeknis katūļu katedralē īeja koncertā byus bez moksys, par tū ka tys nūtiks piļsātys svātku laikā. Vysu interveju ar Gunu vari skaiteit ITE.

Koncerts 31. julī divejuos stuņdēs dīnā Atašīnis Suopu Dīvmuotis Rūmys katuoļu bazneicā
Pyrmū reizi festivals gasteis ari Atašīnis katuoļu bazneicā, kur muzicēs talanteiguo varganiste i vargaņu spielis školuotuoja treis Latgolys muzykys školuos Baiba Betlere i spūdruo, titulātuo muzike soprans Ilze Grēvele-Skaraine. Tiks izpiļdeita kai senejuo muzyka, tai i latvīšu romaņcis.

Koncerts 31. julī ostoņuos stuņdēs vokorā Ludzys Jaunovys Marejis dabasūs uzjimšonys Rūmys katuoļu draudzē
Senejuokajā Latvejis piļsātā varganis spielēs festivala “Latgolys vargaņu dīnys” dybynuotuoja i organizatore ludzuonīte Larisa Carjkova i koloritais tenors Juris Vizbulis. Tiks izpiļdeiti skaistuokī muzykalī veļtejumi Dīvmuotei nu latvīšu i uorzemu komponistu daiļradis.

Koncerts 7. augustā vīnūs dīnā Krystapiļs Vyssvātuos Treisvīneibys Rūmys katuoļu bazneicā
Itūgod vīsmīleigajā Krystapilī pyrmū reizi debitēs varganiste Līga Ivāne i jaunī muziki Līva Tomiņa i Reinis Tomiņš, kuri kūpā ar varganem skandynuos sytamūs instrumentus i akustiskū elektriskū vejūli latvīšu muzykys programā.

Koncerts 7. augustā pīcuos stuņdēs piecpušdīnē Rēzeknis Jezus Sirds katedralē
Rēzeknis Juoņa Ivanova muzykys vydškolā struodoj treis rodūši pedagogi – Ingrīda Balode, Guna Kise i Aldis Kise, kuri itam koncertam apsavīnuojuši kruosainā skaņu gleznā – varganis, akordeons i bolss. Diveju jaudeigu i kruosainu muzykys instrumentu sinteze kūpā ar bolsu ir Latvejā vēļ nadzierdāta kombinaceja.

Koncerta programā pamatā skanēs taišni Juoņa Ivanova muzyka, ari nu komponista ar Latgolys saknem Riharda Dubrys spieciegī dorbi, Romualda Jermaka melodejis i cytys eipaši itam sastuovam aranžātys kompozicejis. Naizpaliks ari cytu tautu muzyka, kura caur gareigom meditacejom sasaveis pasauleigā lyugšonā par itūšaļt svareiguokū.

7. augustā trejuos stuņdēs uorpus festivala “Latgolys vargaņu dīnys” nūtiks ari koncerts jaunuokajā nu Rēzeknis bazneicu – Dīva žālsirdeibys Rūmys katuoļu bazneicā. Koncertā uzastuos vokaluo grupa Schola Cantorum Riga. Tiks atskaņuota vydslaiku sakraluo muzyka – gregoriskais korals i vālūs vysdlaiku polifoniskūs repertuaru pīmāri, kas atspīgeļoj uzastuošonys praksi vysaiduos Eiropys piļsātuos vālūs vydslaiku periodā.