Rokstu sagataveja: portals lakuga.lv

28. juļa vokorā Kuorsovā, pi kulturviesturis centra “Līču mājas”, nūtyka rokstu kruojuma “Kuorsovys stuosti II” attaiseišonys svātki. Tyka saceitys svineiguos uzrunys, izsaceitys pateiceibys gruomotys leidzautorim i īsaisteitajim cylvākim, kai ari izskanēja Arņa Slobožanina i Sovvaļnīka muzykalī prīšknasumi.

2018. godā izguoja dūmneicys “Creative Museum” sadarbeibā ar Kuorsovys nūvoda pošvaļdeibu eistynuotuo pietnīceibys projekta “Kārsavas stāsti” rezultatā radeitais rokstu kruojums ar taidu pošu nūsaukumu. Tymā pyrmū reizi tyka apkūpuoti pietejumi par Kuorsovys nūvoda arheologiskajom vītom, muižu sistemu, dzeļžaceļa viesturi, religiskajom draudzem i ebreju kūpīnys viesturi. Sūpluok akademiskajim pietejumim, asūšūs i bejušūs kuorsavīšus aicynoja daleitīs ar viesturiskajom karteņom, kas uzjimtys da Ūtruo pasauļa kara.

Pyrmuo gruomota vaira viesteja par laiku pyrma 20. godu symta, partū projekta eistynuotuojim ar tuo vadeituoju Inetu Zelču-Sīmansoni prīškgolā beja skaidrys, ka nūteikti ir juoturpynoj, vaira pīsavieršūt jaunuokūs laiku i socialajai viesturei. Tai 2020. godā tyka suokts dorbs pi rokstu kruojuma “Kārsavas stāsti II”, kas stuosta par Kuorsovys viesturi laika pūsmā nu storpkaru perioda leidz pat Latvejis naatkareibys atjaunuošonai. Jaunajā gruomotā var skaiteit Latvejis Universitatis profesora Ērika Jēkabsona pietejumu par Kuorsovu storp divejim pasauļa karim, viesturnīka Valda Kuzmina detalizātu īskotu kaujuos Kuorsovys apleicīnē 1941. goda vosorā, tymā skaitā akademiski aprokstūt ari Hitlera gasteišonu Malnovā, kai ari Agra Dzeņa rokstu par Kuorsovys piļsātys puorvaļdi padūmu okupacejis godūs. Eipašs ir viesturnīka Ulda Neiburga stuosts par Kuorsovu caur vīnys personeibys – fotografa Aleksandra Proboka – dzeivi. “Kārsavas stāsti II” ir ari boguoteigai ilustrāti ar Aleksandra Proboka uzjimtajom karteņom nu 20. g. s. 50.–60. godu.

Bez akademiskajim pietejumim itūreiz gruomotā īkļauts ar plots atmiņu materials, kū nu vītejūs dzeivuotuoju savuokušys Gunta Ločmele i Valentīna Zelča. Kai soka Gunta, itys dorbs jai pīruodejs, ka varātu izdūt vēļ naskaitamys gruomotys ar Kuorsovys pusis ļaužu stuostim. “Cylvāki tik poši vysbīžuok naapsazynoj, ka jī ir lela vierteiba, kuru pīredze ir nūdereiga mums – jaunuokajom paaudzem. Reizem maņ saceja – kū ta es varu pastuosteit!? Bet tys, kas jim ruodīs pošsaprūtami, mums ir vierteiba, kas ļaun secynuot, kai kurā pusē sovulaik ir guojs. Pīmāram, munā Saļņovys pusē vysi bazneicys svātki vysod tyka svynāti, obejis vacmamys stuostejušs, kai vysod kopūs dzīduots i īts procesejuos. A izaruod, ka tepat 9 km attuolumā – Kuorsovā – tuo padūmu laikā eistyn nabeja. Školuotuojis ari stuosteja, kai nazkod iz bazneicu īmūt, sieja lokotus i lyka brillis, kab naatpazeitu. Tys mums ļaun vaira nūviertēt myusu dīnu vuorda, religejis i pošizpausmis breiveibu.” Gunta cer, ka īsuoktais dorbs tiks turpynuots, intervejūt i pīrokstūt atminis ari vēļ nu cytu cylvāku. Jau suokumā saroksts asūt bejs cīši gars, i na vysus nu tuo izadevs satikt i nūintervēt.

Ari Kuorsovys kulturviesturis centra “Līču mājas” vadeituoja Inta Jurča aicynuoja vysus kuorsavīšus i ar Kuorsovys pusi saisteitūs cylvākus turpynuot daleitīs ar sovim stuostim, nest materialus iz “Līču mājām”, kab iz prīšku varātu struoduot ari pi nuokušūs Kuorsovys stuostu izdūšonys.

Rokstu kruojuma “Kārsavas stāsti II” sastateituoja i projekta vadeituoja – Ineta Zelča-Sīmansone, zynuotniskais redaktors ir Dr.hist. Uldis Neiburgs, literaruo redaktore i korektore Austra Celmiņa-Ķeirāne. Grafiskais dizainers – Edvards Percevs. Fotografs – Didzis Grodzs. Atbolsta Kuorsovys nūvoda pošvaļdeiba (Ludzys nūvoda pošvaļdeiba), VKKF, Latgolys kulturys programa, “Creative Museum”. Pasyuteituojs: Kuorsovys nūvoda pošvaļdeiba (Ludzys nūvoda pošvaļdeiba). Izdeviejs: “Creative Museum”.

Fotogalerejā gruomotys “Kuorsovys stuosti II” attaiseišona Kuorsovā, foto Edeite Husare/portals lakuga.lv