Rokstu sagataveja: portals lakuga.lv

Juļa pādejā svātdīnē Aglyunā ļaužu straumis saplyude na viņ iz svātdīnis mišu bazilikā, tok ari devēs apsavērt jaunū lapuošonuos aba dyžuošonuos vītu Aglyunys Rodūšūs industreju centra pogolmā.

Rodūšūs industreju centrs ir pavysam jauna vīta Aglyunā, kuru teik plānuots atteisteit kai uzjiemieju, amatnīku i vītejūs saiminīku apdzeivuotu centru, kur byutu vareiba radeit, ražuot, izruodeit i tuoļuok izplateit sovus produktus. Centrs izbyuvāts, pasasokūt Eiropys Savīneibys projektam.

Preiļu nūvoda vacuokuo komercdarbeibys specialiste Ingūna Bramane ir tys cylvāks, kurs uzajiems pamozam atteisteit centra pīduovuojumus. “Jemūt vārā, ka muns kasdīnys dorbs saistuos ar uzjiemiejim, pošvaļdeibys atteisteibys daļa maņ pīduovuoja paraudzeit pasavērt, kū caur uzjiemieju perspektivu varātu itamā vītā dareit,” tai Ingūna Bramane.

Kai stuosta Ingūna, tod sovstarpejuos sarunuos ar uzjiemiejim tyka nūlamts, ka te, Aglyunā, kas ir atpazeistams turisma golamierkis Latvejis leiminī, byutu labi izveiduot amatnīceibys i suveniru centru. Pyrmuo izsūle par centra telpu nūmu jau tyka organizāta, tok niu uzjiemieji, beistūtīs par kūpejū cenu kuopumu, nagryb īsaguļdeit jaunā vītā, deļtam jaunu izsūli plānuots organizēt pyrma aktivuo turisma sezonys suokuma cyta goda martā.

Ingūna ari papyldynoj: “Par zīmys periodu vēļ dūmojam, tok, īspiejams, ļausim zīmys laikā te organizēt izstuodis i nūtikt vysaida veida regularom darbneicom, ari atseviškim pasuokumim, kab telpys tyktu pīpiļdeitys.”

Sovpus cikom rodūšūs industreju centrs vēļ gaida sovus īmeitnīkus, centra pogolms jau niu ir lobīkuortuota vide, kur sevkurs Preiļu i tyvuokūs nūvodu saiminīks var pasalapuot ar pošu radeitu produkceju.

“Itys pasuokums ir drupeit nūsavārts nu Preiļu Kulturys i turisma puorvaļdis, partū ka agruok nūvodā tyka organizāti pasuokumi, kur vītejī uzjiemieji lapuojušīs sovā storpā. Saprotu – ka niu nasaīt aizpiļdeit telpys, tod vysmoz ir vārts startēt pogolmu, itei ir publiska vīta, pošvaļdeiba par tū naprosa nikaidu nūdavu.

Kaids var atīt ar sovim ogūrčim, vēļ kaids ar sovu madu, ruodeit i stuosteit par sevi plašuokam cylvāku lūkam,” tai pīzeist Ingūna.

Jau pyrmuo lapuošonuos puļcēja ap desmit amatnīku i tyvu pi symts interesentu, kuri guoja apsavērt, kas jauns, lobs i vītejais teik pīduovuots.

Niu teik plānuots, ka kotra mieneša pādejā svātdīnē itamā vītā byus arviņ jauna lapuošonuos. Deļtam pyrma dūtīs iz bazneicu voi piec bazneicys apmeklejuma, cylvākim byus vareiba ari apsavērt kaidus lobumus sagatavejuši vītejī uzjiemieji. Nuokušuo sasatikšona Aglyunā gaidoma jau 28. augustā. Vaira jaunumu par Aglyunys Rodūšu industreju centru meklej jūs Facebook lopā ITE.