Rokstu sagataveja: portals lakuga.lv

Storptautyskais teatra festivals “Soli pa solim” Rēzeknē nūteik kotru ūtrū godu nu 2000. goda. Festivalā ir vareiba īpasazeit ar lobuokajim amaterteatru, naatkareigūs i profesionalūs Latvejis i uorvaļstu teatru īstudiejumim. Itamā reizē festivals nūtiks nu 16. da 18. septembra.

Kotru ūtrū godu rudinī Rēzeknis kulturtelpa pīsapylda ar aizraunūšom teatra festivala “Soli pa Solim” nūtikšonom. Itys ir gaideits nūtykums, kuru apmeklej kai vītejī rēzeknīši, tai ari cytu piļsātu dzeivuotuoji. Festivals aicynoj sūli pa sūļam īpazeit teatra muokslu, paplašynūt redzislūku i pīdzeivuot dažaidu vaļstu volūdu i emoceju izpausmis. Itūgod festivalā pīsadaleis teatri nu Latvejis, Pūlejis, Leitovys i Igaunejis.

Režisore Māra Zaļaiskalns stuosta, ka aktivuo teatra sezona deļ Rēzeknis Tautys teatra suoksīs vēļ nedeļu pyrma “Soli pa solim” festivala, partū ka tikū ir nūsaslāgušys Latvejis amaterteatru īstudiejumu “Gada izrāde 2021” skatis i Rēzeknis Tautys teatra izruode “Sibīrijas haiku” ir izvierzeita finalā, kurs nūtiks 10. i 11. septembrī “Dirty Deal Teatro” i Eduarda Smiļģa Teatra muzejā Reigā.

Sovpus par ituo goda festivalu “Soli pa solim” Māra dasoka: “Itūreiz raudzejom preparēt teatri kai muokslys veidu, kas sastuov nu cytu muokslys veidu. Festivalā byus divys pantonimys, interesanta izruode nu Pūlejis, eipaša sasatikšona Rēzeknis Muokslys nomā, kur teatris byus saisteits ar gleznīceibu i muokslu. Itys festivals vysleidz rauga meklēt jaunys formys, jaunus dramaturgiskūs materialus tai arviņ nu jauna īpazeistūt ari pošim sevi.”

Māra Zaļaiskalns ari atkluoj, ka iz “Soli pa solim” kai skateituoji brauks gostūs teatru kolektivi nu vysys Latvejis. Svareigi pīminēt, ka ari itūgod vysim skateituojim piec izruodem byus vareiba sasarunuot ar izruožu akterim.

Teatra festivalu 16. septembrī 18.00 stuņdēs Latgolys viestnīceibā GORS atkluos režisoris Mārys Zaļaiskalns koncertizruode “Dzeivis graidi”. Izruodis idejis autors ir veiru kuora “Graidi” dirigents Juoņs Mežinskis. Izruodī skanēs originaldzīsmys ar Ilonys Rupainis i Guntrys Kuzminys-Juknys muzyku i Inetys Atpilis-Juganis i Oskara Orlova (Raibīs) tekstim. Izruode byus latgalīšu i latvīšu volūdā.

Sovpus 21.30 stuņdēs Rēzeknis Muoklys nomā byus vareiba apmeklēt performaņcis, pleneru, kinys, īīšonu gleznā, sarunys i sasatikšonu ar festivala dalinīkim.

Pylnu teatra festivala “Soli pa solim 2022” programu meklej ITE.

Vysuos izruodēs vītu skaits ir īrūbežuots. Deļtam beleti juoīsaguodoj aiz laika, tī ir daīmami Latgolys viestnīceibys GORS kasē i Rēzeknis Kulturys noma kasē.