Rokstu sataveja: Egita Terēze Jonāne (Vietējā Latgales Avīze)

Nu ituo gods maja zam Latgolys planavuošonys regiona spuorna struodoj “Europe Direct Dienvidlatgale” centrs, kas sovu darbeibu aizsuoce ar vierīneigu “Vidis dīnu Daugovpilī” i itūšaļt eistynuojs viertini dažaidu nūtikšonu izgleiteibys, uzjiemiejdarbeibys i jaunuotnis sferuos. Niu centrs, sasadorbojūt ar “Vietējā Latgales Avīze” i portalim grani.lv i latgalīšu kulturys ziņu portals lakuga.lv, kab padareitu plotuokys Latgolys īdzeivuotuoju zynuošonys par Eiropys Savīneibu (ES) i īpazeistynuotu ar dažaidu sferu puorstuovim Latgolā, skaiteituojim pīduovoj sarunu cyklu “Eiropys pādi latgalīšūs”.

Itū sarunu cyklu, jemūt vārā, ka 2022. gods Eiropys Savīneibā pasludynuots par Jaunuotnis godu, aizsuoks stuosts par Eiropys davumu aktiva daugovpilīša Jorena Dobkeviča dzeivē, kurs prasmeigi īsaista jaunīšus vysaiduos aktivitatēs, kurys finansiejušys dažaidys ES programys.

Jorens vysa pyrma izsvēre sovys školys – J. Pilsudska Daugovpiļs vaļsts pūļu gimnazejis – atvierteibu demokratejai, vuorda breiveibai, tom vierteibom, kas ir ES lobkluojeibys i izaugsmis pamats. “Škola beja tei, kas myusūs izkūpe vuorda breiveibu, tei nasabeide īvīst eksperimentaluos programys, metodis, pīeju, izmontuot Eiropys Savīneibys i Pūlejis vaļdeibys programu atbolstu. Kod vuicejamīs suokumškolā, beja pyrmī braucīni iz Pūleju, tai mes uzlobuojom pūļu volūdu, satykom jaunus draugus i īpazynom pūļu Pūleju, cytys kulturys, tradicejis, skotupunktus i tml. Pi tuo myusūs pamozeišam izaveiduoja ari cytys kulturtelpys saprasšona. Tīpat školā varēju īpazeit sovus vīnaudžus ari cytuos Eiropys vaļstīs, jo škola ir īsasaistejuse školānu apmainis programuos. Par pīmāru, mes, byudami vēļ školāni, poši rakstejom i poši eistynuojom Eiropys Savīneibys “Erasmus+” programys projektus. Tī beja kai taids pļuss izgleiteibai i interesem, jo tu īsavuici jaunu volūdu, padzilinuoti izzynoj konkretu dzeivis sferu, sateic školānus nu vysa pasauļa. Piečuok ar itū lelū zynuošonu, ideju, pīredzis bagažu, kū dabuoju školā i Eiropys programu projektūs, guoju tuoļuok studeju i dorba gaituos. Pats asu bejs jau ap 30 “Erasmus+” projektūs i pabejs vaira nakai 35 vaļstīs,” izsvēre Jorens.

Jorens pazeist ari breivpruoteiguo dorba kusteibu, kas ir cīši populara kai Eiropā, tai cytūs kontinentūs. Jis kai breivpruoteigais struoduojs Pūlejis Nacionaluos atminis viesturis centrā (Varšovys sasaceļšonys muzejs). Piečuok, byudams Pūlejis Parlamenta fonda “PpnW” īriednis, Jorens īpazyna, kai funkcionej vaļsts institucejis.

Itūšaļt Jorens ir bīdreibys “New East” vadeituojs, roksta i eistynoj naformaluos izgleiteibys, navaļstiskuos kulturys, medeju i sabīdreibys īsasaisteišonys projektus Daugovpilī i cytur Latgolā. “Muna piļs ir Daugovpiļs, jo itei ir tei piļsāta, kas ar jiegšonu sadzeivuot dažaidom volūdom, tauteibom i religejom ir pīmārs puorejam pasauļam, kai ceļt reitdīnys breivū i demokratiskū sabīdreibu, meklēt pozivitus pīmārus i nasabeit nu pasamaineišonys,” atsazeist Jorens. Pi tuo bīdreiba “New East” itūgod ir regionalais “Eurodesk” koordinators Latgolā i taisa projektu darbneicys, naformaluos teikluošonuos i cytys nūtikšonys.

Jorens aicynoj jaunīšus jau školys laikā interesētīs par Eiropys Savīneibys atbolsta programom i pasuokumim, deļtuo ka tys vyss vairoj poša breiveibu runuot, izagleituot, ceļuot, eistynuot sovus projektus i īceris.

Kai stuosta “Europe Direct Dienvidlatgale” vadeituojs Oskars Zugickis, sadarbeibā ar regiona vuiceibu īstuodem i jaunīšu bīdreibom “New East”, “Dagne” i cytom, centrs īplanavuojs reikuot viertini jaunīšus īsaistūšu i izgleitojūšu nūtikšonu, par pīmāru, taids byus jau 27. augustā Augšdaugovys nūvoda Vyškūs paradzātais “Demokratejis festivals”, kurā sasatiks vaira nakai 120 Latgolys regiona jaunīšu.

Vysu jaunuokū informaceju par “Europe Direct Dienvidlatgale” darbeibu i pakolpuojumim var izzynuot Facebook.com/EuropeDirectDienvidlatgale i sātyslopā lpr.gov.lv.