Rokstu sagataveja: portals lakuga.lv

Latgolys Kulturviesturis muzejs aicynoj Latgolys muokslinīkus da 31. oktobra īsnēgt dorbus kasgadejai rudiņa izstuodei, kam itūgod dūts nūsaukums “Pavards/Puorts”, informej muzeja puorstuovi.

Latgolys Kulturviesturis muzejs gaida sasatikšonu i ar itūgod radeitim Latgolys muokslinīku dorbim, i ar muzeja apmaklātuojim rudiņa izstuodē. Kai īrosts, tei durovys attaisa novembrī, sagaidūt Latvejis vaļsts proklamiešonys kuortejū godadīnu.

2022. godā par rudiņa izstuodis moto ir izvierzeita tema “Pavards” aba latgaliski “Puorts”. Puorts kai cylvākus vīnojūšs motivs, syltums i patvārums, puorticeiba i saimis puļciešonuos vīta. Vīnojūšais centrs, kur sasateik vysaidu paaudžu i redzīņu ļauds. Dzimtys šyupeļs i atmiņu lauskys vactāva stuodeitūs līpu pakrieslī, pīdereiba i atsvešynuoteiba. Pasauļa aicynuojums i dūšonuos nazynomajā, atrūnūt jaunu sātu i īkurūt jaunu puortu. Vyss materialais aizīt i pagaist, tok dvēsele vēļ atsasauc aicynuojumam izkuopt dzymtys sātys pakolnā.

Latgolys Kulturviesturis muzeja Muokslys nūdalis vadeituoja Inese Dundure portalam lakuga.lv pārņ stuosteja, ka idejai par itaidu kasgadeju Latgolys muokslinīku izstuodi ir senejis saknis – myusu laiku izstuodis tradiceja aizasuokuse 1996. godā, kod Rēzeknē tyka svieteita 1936. goda II Latvejis pļuovis svātku, kurymūs beja ari muokslinīku dorbu izstuode, godadīna, i roduos ideja atjaunuot izstuodis tradiceju – leidza ar tū itūgod Latgolys muokslinīku izstuode svietej 25 godu jubileju. Reizē itaida izstuode ir ari 70.–80. godu profesionalūs muokslinīku izstuožu, kurūs organiziešonys dorbus dareja muokslinīks, profesors Osvalds Zvejsaļnīks, tradiceja, kurei iz kaida laika beja pagaisuse. Atškireibā nu tuo laika myusu dīnu izstuodēs ir naviņ profesionalūs muokslinīku dorbi, nu kūpeigā izstuodē var pīsadaleit ari studenti aba tūpūšī muokslinīki i muokslinīki-autodidakti.

Nu vysu īsnāgtūs dorbu izstuodis dalinīkus izavielej žureja. Inese vys saceja, ka ituo laika izstuodis vysā navar saleidzynuot ar sovulaik nūtykušajom profesionalūs muokslinīku izstuodem, jo pīsadola plotuoks muokslinīku spektrys. Ka tūlaik muokslinīki izstuodei tykuši specialai paaicynuoti, niu dorbus īsnādz poši dalinīki, bet tūs viertej i atlosa žureja, kurymā ir muokslinīki, kurī napīsadola izstuodē, vītejī muokslys viesturnīki i ari Latgolys Kulturviesturis muzeja darbinīki. Kai breineigu nūtikšonu Inese viertej muzeja vareibu piečuok lobuokūs dorbus nūpierkt i papyldynuot muzeja kruojuma Latgolys muokslinīku dorbu fondu: “Mes asam laimeigi par itaidu vareibu, jo tei ir īspieja sekuot leidza Latvejis muokslai leidza i turēt rūku iz pulsa!”

Fotogalerejā pārnejuo gods Latgolys muokslinīku izstuode “Pēdas/Pādi” Latgolys Kulturviesturis muzejā, foto Edeite Husare/portals lakuga.lv