Rokstu sagataveja: portals lakuga.lv

Treis muosu muzykys apvīneiba “Muosys” publicej videoklipu dzīsmei “Vysys dīnenis zynuoju” i ar tū īsuoc ituo gods golā izdūt paradzātuo albuma “Ceļā”, kurā byus īkļautys treispadsmit latgalīšu tautysdzīšmu aranžejis i originalkompozicejis, gaideišonu.

Grupa “Muosys”, kurā apsavīnuojušys treis profesionalys muzikis i reizē muosys Laima Maslova, Liene Brence i Marta Igaune, izaveiduoja i sovu darbeibu suoce 2016. godā ar Igauņu saimis albuma prezentaceju i koncertu “Vysi zīdi pļaveņā” Latgolys viestnīceibā GORS. Itys koncerts deve impulsu tuoļuokajai muziķu darbeibai, i piec tuo muosys suokušys bīžuok sasatikt i muzicēt taišni trejatā.

Grupys muzike i “Vysys dīnenis zynuoju” aranžejis autore Liene Brence stuosta, ka dzīsme “Vysys dīnenis zynuoju” ir veļtejums tim puorim, kurim kuozu dīnā ir leits. “Lai jī nabādoj! Latgalīšu gudreiba viestej, ka tī, kur nūleis leita lase, tī osoru nabyus, bet byus skaista i laimeiga dzeivuošona,” soka Liene.

Dzīsmis videoklipā, kura operators ir Ivars Utināns, īmyužynuotys dažaidys Rēzeknis nūvoda vītys. “Mes pošys īmam nu Gaigalovys pogosta, deļtuo navarējom īsadūmuot vēļ skaistuokys i atbiļstūšuokys vītys fiļmiešonai kai tepat – pi Lubuona azara iudiņa turisma centrā “Bāka” i Teirumnīku pūra styguos,” par videoklipa tapšonu stuosta muzikis. Videoklipā dzīsmis soliste ir Marta, flautys pavadejumu spēlej Laima, bet gitaru Liene.

Ituo gods golā grupa “Muosys”, sasadorbojūt ar bīdreibu “Latgolys Producentu Grupa”, īcerējuse izdūt albumu “Ceļā”, kurā byus 13 latgalīšu tautysdzīšmu aranžejis i originalkompozicejis. Tuos pamatā veiduojuse etnomuzikologe i grupys “Muosys” vejūļneica Liene Brence, kurei dzīšmu muzykalū redziejumu givuse dobys ainuos, sovys dzymtys styprajuos saknēs, kai ari baroka i skandinavu tradicionaluos muzykys intonacejuos. Albumu grupai “Muosys” īraksteit i sataiseit paleidz tradicionaluos muzykys īrokstūs i aranžejuos pīredziejušais Einārs Lipskis.

Albuma “Ceļā” izdūšonu i videoklipa “Vysys dīnenis zynuoju” fiļmiešonu atbaļstejuse Vaļsts kulturkapitala fonda Latgolys kulturys programa, kurū eistynoj Latgolys regiona atteisteibys agentura, bet finansiali atbolsta AS “Latvijas valsts meži”.