Rokstu sagataveja: portals lakuga.lv

Pasasokūt bīdreibys “Latgolys etnografiskuo viestnīceiba” vadeituojis Ivetys Seimanovys iniciativai, tautystārpūs apvylktūs leļu kolekceja turpynoj ceļuot pa tyvuokom i tuoluokom zemem. Itūšaļt leidz 21. septembram izstuode apsaverama Eduarda Smiļģa Teatra muzejā Reigā.

Tautystārpūs apvylktūs leļu kolekcejis “Lobs ar lobu sasatyka” ideja roduos Nikodema Rancāna bolvys školuotuojim padūšonys laikā piec tuos šaļts izgleiteibys i zynuotnis ministris Ilgys Šuplinskys īrūsynuojuma, ka byutu labi sataiseit Nikodema Rancāna tāluojuma “Ceļuojums pa Latgolu” (paraksteits ar pseidonimu Kristops Brems – red.) Madaļu varūnis itaidā formatā. “Latgolys kongresam tyka sapucātys 37 Latgolys “delegatis” (lelis tautystārpūs), kas puorstuovēja vysaidys Latgolys vītys, partū ka sevkuram mozam cīmam ir ar kū lapnuotīs,” tai par sovu aizrauteibu ar Latgolys senejū apgierbu soka leļu veiduotuoja Iveta Seimanova. Jei ari papyldynoj, ka byuteibā vyss suokuos ar Reigys ryupneicys “Straume” lelem vuordā Baiba, kurys jei sajēme duovynuojumā. Lelis niu ceļoj pa pasauli, izvītuotys vairuokūs čemodanūs, kur kotram ir sovs stuosts – godalaiki voi latvīšu tradicionalī godskuortu svātki. Pylnu interveju ar Ivetu skaiti ITE.

Nu izstuodis atkluošonys Latgolys kongresā ituo gods aprelī lelis ir izceļuojušys pa daudz i vysaidom vītom. Kai stuosta poša Iveta: “Maņ beja svareigi, kab suokumā lelis tyktu atruodeitys tepat Latgolā.” Nu Rēzeknis lelis brauce iz Preilim, Daugovpili i piečuok iz Kuorsovu, taipoš lelis gastejušys ari Raiņa muzejā “Jasmuiža” Preiļu nūvodā.

Sovpus niu vēļ leidz 21. septembram lelis aizceļuojušys i byus apsaveramys Eduarda Smiļģa Teatra muzejā Reigā. Iveta pastreipoj, ka izstuodis atkluošona Reigā bejuse eistyn sirsneiga i ka reidzinīki eistyn nūviertej latgaliskū kulturu. “Iz izstuodi tyka paaicynuots ari Ukrainys viestnīks Latvejā Oleksandrs Misčenko, kuram pasnēdzem leli Ukrainys tautyskūs motivu tārpā. Tys beja eipašs breids,” stuosta Iveta Seimanova.

Iz E. Smiļģa muzeju atceļuojušys jau 47 lelis. Kai stuosta Iveta, tod šyut vēļ varātu daudz, tok, īspiejams, paliks pi 55 leļu, kab kotram nūvodam byutu pa lelei, tymā skaitā ari Sielejis kulturviesturiskajam nūvodam.

Izstuodis atkluošonā ar kūpīnys “Rīgas danči” paleidzeibu pyrmū reizi itymā godu symtā tyka izīts eipašs daņcs “Skaties tu uz mani”, kuru 1988. godā pīrakstejuse Ivetys veira babeņa Bronislava Seimanova. Taipoš izstuodis atkluošona tyka boguotynuota ar gordim septeņu veidu sīrim nu Preiļu nūvoda Stabuļnīku zemnīku saimisteibys “Bojāri” i pīcu veidu pluotsmaizem, kas captys piec senejūs receptu. Kai stuosta Iveta: “Iz Reigu braucem atruodeit vysu Latgolys kulturu, suokūt nu tautystārpim leidz pat kulinarajam montuojumam i daņčim, itei laikam paliks vysvierīneiguokuo ituo projekta izstuode.”

Niu lelem jau sagataveits eipašs dorba grafiks leidz pat cyta gods vydam. Planā ir dūtīs iz Alsungu Kūrzemī, Briseli, Leitovu, Pūleju i cytom vītom.

Kai viestejom ari īprīšk, itam projektam byus turpynuojums. Sagaidams, ka taps eipašs fotoprojekts, kurā pīsadaleis kai mozuo lele, tai i cylvāks taišni taidā pošā tautystārpā. Vys fotoprojektam byus ari papyldynuojums, tok par tū viesteisim drupeit vieļuok.

Galerejā: izstuode “Lobs ar lobu sasatyka” Reigā, foto Edeite Husare/portals lakuga.lv i izstuodis atkluošona, foto Ilze Strēle