Rokstu sagataveja: portals lakuga.lv

Latvejis Bibliotekaru bīdreibys (LBB) Latgolys nūdaļa 9. septembrī aicynoj pīsavīnuot tīšsaistis konferencei “Latgolys kulturys montuojuma sardzē: īdvasmojūt, izgleitojūt, dorūt!” Konferencis mierkis ir aktivizēt, spiecynuot i vīnuot Latgolys bibliotekaru kūpīnu kulturviesturiskuo montuojuma izzynuošonā, saglobuošonā i nūdūšonā.

Konferencis laikā Latgolys bibliotekarim byus vareiba atsavērt iz lobuos praksis pīmārim, veicynojūt zynuošonu puornesis ilgtspieju i jaunu ideju eistynuošonu bibliotekuos i vītejuos kūpīnuos. Ituo gods konferencī eipaši tiks pastreipuota nūzeimeigu Latgolys personeibu lūma i nūzeime kulturys, volūdys, literaturys i gruomotnīceibys atteisteibā Latgolā i Latvejā.

Konferencis dīna byus pīpiļdeita ar vareibom bibliotekarim paaugstynuot profesionaluos kompetencis. Pyrmajā sesejā paredzāta Rēzeknis Tehnologeju akademejis docentis Angelikys Juško-Štekelis lekceja “Fraņča Trasuna davums latgalīšu folkloristikā”, viesturnīka Kaspara Stroda lekceja “Storp izgleiteibu i politiku: sabīdryskuo darbineica Valereja Seile”, Vinetys Ločmelis lekceja “Vladislava Luoča dzeive i darbeiba”, ka ari Marutys Latkovskys lekceja “Romani latgalīšu rokstu volūdā (1939.–2021. g.)”. Pylna konferencis programa daīmama ITE.

Sovpus ūtrajā sesejā svareiguokais akcents teik lykts iz pošu bibliotekaru īguļdejumu i sovstarpejuos pīredzis apmaiņu lokaluo montuojuma saglobuošonā i storpnūvodu sadarbeibā. Interesants ūtruos sesejis akcents byus Leitovys tulkuotuoja i režisora Edmunda Untuļa lekceja par Latgolys literaruo montuojuma pādim Žemaitejā (Leitovā). Kai stuosta Rēzeknis Centraluos bibliotekys vadeituoja Ruta Suseja: “Edmundas kasdīnā interesejās par mozajom Eiropys volūdom. Da šam jis leitovīšu volūdā ir tulkuojs vairuoku Latgolys ailinīku ryndys, taipoš jis ir iztulkuojs Ingys Ābelis romanu “Klūgu mūks”.”

Svareigi ari izviertēt padareitū i īzeimēt perspektivys iz prīšku Latgolys kulturys vierteibu (volūdys, literaturys, izcylu personeibu itt.) apzynuošonā i populariziešonā. Registraceja konferencei daīmama ITE.

Rēzeknis Centraluos bibliotekys vadeituoja Ruta Suseja aicynoj: “Vysa pasuokuma programa byus cīši interesanta i pīsaslēgt tīšsaistī teik aicynuots kotrys interesents, naatkareigi nu profesionaluos pīdereibys.”

Konferenci organizej LBB Latgolys nūdaļa, Rēzeknis Centraluo biblioteka ar Latvejis vaļsts mežu i Vaļsts kulturkapitala fonda Latgolys kulturys programys, “Europa Direct Austrumlatgalē” i Rēzeknis vaļstspiļsātys pošvaļdeibys atbolstu.