Rokstu sagataveja: portals lakuga.lv

Latgalīšu volūdys, literaturys i kulturviesturis školuotuoju asociaceja (LVLKŠA) aicynoj da 10. septembra pīsasaceit īinteresātuos školys i školuotuojus, kuri ar 2022./2023. vuiceibu goda septembri gryb vuiceit 36 stuņžu kursu latgalīšu rokstu volūdā, kab veicynuotu tuos nūsastyprynuošonu i atteisteibu. Kai nūruoda LVLKŠA vaļdis prīšksādātuoja Veronika Dundure, ir izpiļdeiti vysi formalī nūsacejumi, kab latgalīšu rokstu volūdu voi nūvodvuiceibu īvīstu školā, jo apstyprynuoti kai vuiceibu prīškmatu standarti (2013), tai programu paraugi (2021).

Vaļsts Kulturkapitala fonda (VKKF) „Latvijas valsts mežu” finansātajā mierkprogramā jau ūtrū reizi pīškierts finansiejums latgalīšu rokstu volūdys vuiceišonai, tai ļaunūt vaira nakai 25 školuos Latgolā nūdrūsynuot kursa “Latgalīšu rokstu volūda” vuiceišonu i samoksu pedagogim par padareitū dorbu. Tys ir suokums latgalīšu rokstu volūdys plašuokai vuiceišonai izgleiteibys īstuodēs atbylstūši Latvīšu viesturiskūs zemu lykuma 4. panta 8. punktā nūsaceitajam: “Vaļsts i attīceiguos pošvaļdeibys nūdrūsynoj latgaliskuos identitatis i kulturviesturiskuos vidis saglobuošonu i ilgtspiejeigu atteisteibu, tymā skaitā veicynojūt latgalīšu volūdys kai latvīšu volūdys paveida vuiceišonūs, tymā skaitā izgleiteibys īstuodēs, i lītuojumu publiskajūs pasuokumūs i kasdīnys dorbā, kai ari atjaunojūt i vidē izmontojūt vītvuordus latgalīšu volūdā, tymā skaitā skaitā ceļazeimēs, vītu i īlu nūsaukumūs.”

LVLKŠA sadarbeibā ar augstškolu vuiceibspākim i školuotuojim, kuri jau vuica latgalīšu rokstu volūdu, projektā īsaisteitajim školuotuojim snēgs metodiskū atbolstu.

Aizvadeitajā vuiceibu godā itū vareibu izmontuoja 17 školys i 21 školuotuojs gondreiž vysā Latgolā (izjamūt Daugovpiļs piļsātu i Leivuona nūvodu). Tuos bejušys kai uorpus stuņžu nūdarbeibys, tok atspīgeļuotys E-klasē, školuotuoji poši izstruoduoja sovus tematiskūs planus, izceļūt taišni sovys pusis latgaliskuos vierteibys.

Pīsacejuma veidlopa juoaizpylda da 10. septembra.