Rokstu sagataveja: portals lakuga.lv

Jau ūtrū godu rudiņa saulgrīžu svātkūs latgalīši gasteis Latvejis Etnografiskuo breivdobys muzeja Latgolys cīma pogolmūs, kur Latgolys planavuošonys regions sadarbeibā ar bīdreibu “Latgolys tematiskī cīmi” organizej Mikeļa dīnys svātku tierdzeņu, viestej nūtikšonys reikuotuoju publicātuo informaceja.

Latvejis Etnografiskuo breivdobys muzeja Latgolys cīma pogolmūs sevkurs byus gaideits gosts 24. septembrī nu 10 leidz 17 stuņdem, kur byus vareiba sasatikt ar amatnīkim i muojražuotuojim nu vysys Latgolys.

Iz itim rudiņa ražys svātkim byus sabraukuš latgalīši ar devizi “Latgalīši Reigā brauc!”. Byus Mikeļa dīnys tiergs, ļustis i daņči, kai ari Latgolys amatnīku meistarklasis, kur sova omota prasmis ruodeis kūkamatnīki i pūdnīki, byus vareiba paraudzeit veit prīveitis piec senejuom tehnikom, izgatavuot vitražys i līt svecis. Vysys dīnys garumā skanēs latgalīšu muzyka i daņči ar kapelu “Dziga” nu Rēzeknis (vadeituoja Dace Baltkāja) i Ilmāru Dreļu. Apmaklātuoji varēs pīsadaleit konkursūs i sajimt bolvā amatnīku izstruoduojumus.

Tierdzeņā byus kai labi zynomu muokslinīku darynuojumi, tai ari koč kas jauns, par pīmāru, modernys i kūšys dizaina uodys sumkys nu “Zelma Kraft“, originali kūka izstruoduojumi nu “Eko pinus”, izsmalcynuotys stykla pērlis voi kausāta stykla dekori nu Ingys Salmenis, kai ari unikalys meikstuos rūtaļlītys nu Tatjanys Sorokinys. Tok kūpā byus tyvai pi 20 vysaida veida amatnīku i muojražuotuoju.