Rokstu sagataveja: portals lakuga.lv

“Giut breidi” ir plānuotuojs ar eipašu saturu i dizainu, taipoš ari vīneigais plānuotuojs latgaliski. “Giut breidi” sātyslopā suokusēs 2023. goda plānuotuoja īprīškpuordūšona. Deļtam sasazynuojom ar plānuotuoja izstruodis komandu i aizdevem vaicuojumus par tū, voi cytagods plānuotuojā byus kaidys izmainis.

Plānuotuoja izstruodis komanda nav mainejusēs: idejis i satura autore Līga Springa, vizualizaceju autore Liāna Merņaka-Nikitina i foto autore Amanda Anusāne. Līga Springa stuosta, ka, pasasokūt jau asūšajai pīredzei, bailis suokt koč kū taidu veiduot niu jau ir mozuokys, iz reizis asūt bejs skaidrs, kaidā vierzīnī dūtīs. “Pyrmajā godā mes lēcem pīdzeivuojumā, kur kotra jauna dīna beja nazynoma, itūgod asam īsaklausejušys auditorejis īsacejumūs i sovuos personeigajuos atziņuos.”

Itūgod plānuotuoja tema ir cylvāks. Kai skaidroj “Giut breidi” komanda, nav nikuo svareiguoka par cylvāka dzeiveibu i vareibu byut iz ituo pasauļa. Plānuotuojā byus īkļautys 12 Latgolys personeibys, kurys daleisīs sovuos puordūmuos par dzeiveibu i dobu. Papyldynojūt personeibu puordūmys i atzinis, byus vareiba pazust Amandys Anusānis fotografejuos, kas roda dziļuma sajiutu i šaļts nūskaņu. Amanda Anusāne stuosta: “Es nasaucu sevi par fotografu, asu entuziaste, kurai fotografejis ir lela daļa nu kasdīnys koč voi mirkļa pīfiksiešonā. Kod Līga saceja, ka plānuotuojā varātu izvītuot munys fotografejis, es beju cīši pateikami satraukta.” Amanda nu 2016. goda aizaraun ar analogū fotografeju, viņ 2020. godā suokuse fotografēt ar digitalū kameru.

“Plānuotuojā “Giut breidi” varēs redzēt munys fotografejis, kas uzjimtys itūs godu laikā kai analogajā, tai i digitalajā tehnikā. Plānuotuojā izceļsim tekstus, kurus pastreipuosim ar papyldu nūskaņu fotografejom. Ceru, ka ari cytim izadūs nūgiut sovys sajiutys,” tai Amanda Anusāne.

Golvonuos izmainis “Giut breidi” 2023. godā ir vuordadīnu īkļaušona, kas beja cīši gaideitys jau pyrmajā plānuotuojā. Taipoš plānuotuojam byus drupeit cyts izmārs, kas ļaus lītuotuojim vaira raksteit, byus bīzuokys lopys i cītuoki vuoki. Eipaši juoizceļ ari muokslineicys Anastasijis Bikovys vuoka dizains, kas ir izadevs cīši harmonisks i spieceigs.

Vaicuom ari, kai rodīs nūsaukums “Giut breidi”? Kai izaruod, itys nūsaukums sevī nas stuostu par babu, kura vysod lītuojuse vuordu salykumu itymā breidī. Kai soka plānuotuoja izveidis komanda: “Mes zynim, ka latgaliski pareizi byutu lītuot nūsaukumu “Giut šaļti”, tok itymā gadīnī izavieliejom saglobuot bierneibys atminis. Cikom saturiski, sasadorbojūt ar portalu lakuga.lv, mes veidojam kvalitativu produktu latgalīšu volūdā, kura mierkis ir lītuot i vuiceitīs itū volūdu kasdīnā.”