Daugovpiļs Kulturys piļs ar eipašu koncertu atzeimēs sovu 50. jubileju
Rokstu sagataveja: portals lakuga.lv
Ituo gods 22. oktobrī 18.00 stuņdēs Daugovpils Kulturys pilī (Smiļšu īlā 92) nūtiks Kulturys piļs 50 godu jubilejis koncerts. Apmaklātuojim byus vareiba sasatikt ar Dināru Rudāni, grupu “Elpa”, Juoni Aišpuru, grupu “Varang Nord”, folklorys kūpu “Svātra”, grupu “Dabasu Durovys” i Janu Dudari, kai ari orkestri “Daugavpils Sinfonietta”, orkestri “Daugava”, kori “Daugava”, deju studeju “Stop Time dance studio” i eipašajom gaškom – reperi ŪGU i Lauru Svikšu.
Kai viestej pasuokuma organizatori, itūreiz svātku programa byus drupeit cytaiduoka, nakai ir īrosts taida veida jubilejuos. Pasuokuma pyrmuo daļa ritēs akademiskā formā, byus vareiba dzierdēt orkestri “Daugavpils Sinfonietta” ar klasiskuos muzykys pērlem, sovpus piec storpbreiža muzykalā uzvadumā apsavīnuos vysaidu žanru Daugovpiļs slovonuokuos grupys i orkestri, tymā skaitā ari legendaruo rokgrupa “Elpa”, folkmetala grupa “Varang Nord”, popgrupa “Dabasu Durovys”, orkestris “Daugava”, “Stop Time dance studio”, repere ŪGA i cyti solisti.
Koncertu nūslēgs izcyluo dzīduotuoja Dināra Rudāne ar pasaulī slovonu muokslinīku repertuaru – Smoke on the water, Billie Jean, Shape of my heart, Simply the best i cytom atpazeistamom melodejom.
Beleti pīejami “Biļešu paradīzes” kasēs, škārsteiklā ITE, kai ari Daugovpiļs Kulturys piļs kasē.
