Rokstu sagataveja: Amanda Anusāne, portals lakuga.lv

Ka vacuokuos paaudzis latgalīšu volūdu izmontoj bīži, tod jaunīšu vydā vys tik bīži latgalīšu volūdu nasaīt dzierdēt. Kaids tam varātu byut īmeslis i kai latgalīšu volūdā īinteresēt jaunuokus cylvākus, vaicojam jaunīšu raidejuma “Pīci breinumi” (#5breinumi) vadeituojim. Jim taišni itys raidejums ir vīns nu veidu, kai latgalīšu volūdā runuot na tik ar babu i dzedu, nu ari radejis ēterā, pošim vaira aizadūmojūt par sovom saknem i naapzynuotai mudynojūt latgalīšu volūdu izmontuot ari cytus jaunīšus.

Nu kurīnis asat pa dzimšonai i kaida ir jiusu dzymtuo volūda?

Edgars: Pa dzimšonai asu nu Rēzeknis, pyrmuo volūda, kuru īsavuiceju, beja latgalīšu volūda. Ar vysim sovim rodim jau nu bierneibys runoju tikai latgaliski. Ar krysttāvu tik latviski, jo krystamuote īsaprecēja ar čyuli, nu jis dzeivoj Latgolā i jam jau dvēsele par latgalīša dvēseli palyka.

Līna: Es ari asu nu Rēzeknis, nu muna pyrmuo i niu primaruo sazinis volūda ir latvīšu. Tok jau nu bierneibys latgalīšu volūda beja maņ apleik, jo saimē vysi sovā storpā sasarunuoja latgaliski, tik ar mani i munu muosu – latvyski. Tagad nikas nav mainejīs, vīneigi ar tāvu niu sasarunoju tikai latgaliski.

Baiba: I es pīdzymu Rēzeknis slimneicys dzemdeibu nūdaļā. Muna pyrmuo volūda ir latvīšu volūda, vacuoki apzynuoti narunuoja ar mani latgaliski, kab naizaveiduotu styprys akcents, taida beja jūs nūstuoja. Pīmiņu taidu gadīni ar munu vacuoku draugim, kuri uzstuoja, ka jī vuiceis sovim bārnim latgalīšu volūdu. Daīmu pi mamys ar tēti i prosu: “Es gribu cepumiņu!” “Kādu cepumiņu, tys ir capums!” jūs draugs atcierta. Jim par itū nasakryta vīdūkli. Latgalīšu volūdu es īsavuiceju krītni vāluok.

Daiga: Asu nu Viļānu, muna dzymtuo volūda ir latvīšu volūda, jo bierneibā vacuoki ar mani narunuoja latgaliski, koč ari sovā vydā sasarunuoja, nu ar mani latgaliski runuoja baba i dzeds. Sovpus niu ari saimē vaira suokam sovā vydā sasarunuot latgaliski.

Juoņs: Vyspuor asu dzims Reigā, nu, kai soka, fundamentu maņ vacuoki īlyka Bolvu nūvoda Brīžucīmā i Baļtinovā. Mama maņ eistuo latgalīte, tāvs čyuļs, partū tai kai dzymtuo volūda ir latvīšu, bet ar mamu runoju tikai latgaliski.

Kod tod jius vaira suokot runuot latgaliski?

Baiba: Pyrmū reizi atguoju nu bārnuduorza i suoku dzīduot dzīsmeiti par vardivi latgaliski, baba beja cīši puorsteigta.

Tod koč kai “sasasyuču” volūdu nu babys i mamys krystamuotis, kurys ar mani runuoja latgaliski, tai tys pamozom aizguoja. Es naseņ pīfiksieju, ka muns veirs dūmoj latgaliski, juo saimē ari vysi runoj latgalīšu volūdā, saīt, ka jis bīži naapzynuoti runoj latgaliski, leidz ar tū mes ari vaira sātā izmontojam latgalīšu volūdu. “#5breinumi” maņ beja lels gryudīņs vaira lītuot latgalīšu volūdu.

Līna: Ar latgalīšu volūdu maņ vysod ir bejs tai, kai ar krīvu volūdu, tei vysod ir pastuoviejuse maņ leidza, es tū zynu i saprūtu, nu kasdīnā naizmontoju. Školys laikā saguoja pošai praktiskuok izmontuot, vaira bazneicā, kod vuicejūs muzykys školā i staiguoju iz bazneicys kori, kuru vadeja muna klavīru školuotuoja. Tuoļuok lelais atspierīņa punkts, prūtams, beja “#5breinumi”, es pat saceitu, ka tys beja izaicynuojums, jo es dūmoju latvyski. Saprotu, ka vajag vaira izmontuot latgalīšu volūdu, i saimē praseju, lai vysi ar mani niu runoj latgaliski, nu iz itū atsasauce tikai tāvs, saceidams: “Prūtams, mes jau seņ tai variejom dareit!”

Edgars: Latgaliski runuoju tikai saimē, školā i cytur – latvyski. Tod aizguoju pi vīna, ūtra, treša klasisbīdra gostūs, tī saimē ari runoj latgaliski, izaruod, ka klasē gondreiž vysi sātā runoj latgaliski.

Tei beja kaida klase deveituo, i es tod beju vīns nu iniciatoru, kurs saceja: “Davai, runojam latgaliski, parkū mes sovā storpā izmontojam latvīšu volūdu, ka sātā taipoš teik runuots latgaliski!” Bet beja gryuts, paguoja diveji godi, kod piļneibā puorsaslēdzem iz komunikaceju latgaliski.

Daiga: Latgalīšu volūda munā kasdīnā beja bierneibā, kod beja dzeivi vacvacuoki. Pādejūs divejus godus latgalīšu volūda munā dzeivē teik izmontuota daudz aktivuok, vysintensivuok latgalīšu volūdu suoku lītuot, kod puorsavuoču nu dzeivis Reigā iz Rēzekni. Niu dorba specifika ir golvonais motivators runuot latgaliski. Runoju ar kolegim, šod tod ari veikalā, ar vacuokim i paziņom.

Juoņs: Vysvaira laikam tod, kod puorsacieļu iz Rēzekni. Runuoju ari bierneibā, mama maņ vuiceja. Kod augu leluoks, tod jau ar rodim ari suoku. Tagad draugu/ paziņu lūkā izmontoju latgalīšu volūdu. Parkū tai? Tai laikam lobuok i tiuļuok nazkaidā mārā, latvyski jau vysi saprūt, nu latgaliski ir konekšens, kai soka.

Kod jius asat kompanejā, kur ir cylvāki, ar kurim jius sovā storpā sasazynojit atškireiguos volūduos, kuru volūdu jius jemit kai prevaliejūšū?

Edgars: Pa munam, vysi latvīši, tai skaitā latgalīši, koč kaidūs momentūs ir puoruok pretimnuokūši, vysvaira itys nūvāruots ar krīvu volūdu, ka četru cylvāku kompanejā vīns runoj krīvyski, tod vysdrežuok vysi suoks runuot krīvyski. Saisteibā ar latgalīšu volūdu maņ ir tai, ka pat ir kaids, kas latgaliski nasaprūt, tod ar puorejim es taipat runuošu latgaliski, nu ar jū kod nakod varbyut puorsasliegšu, pīmāram, iz latvīšu.

Līna: Ka prevalej latvīšu i latgalīšu, tod uzvar latvīšu volūda. Puorsvorā ari asu kompanejuos, kur runoj latvyski. Ka tei ir daudznacionala kompaneja, tod parosti uzvar angļu volūda. Parosti, ka kaids runoj volūdā, kuru es saprūtu, nu tei nav muna dzymtuo, es puorsaslādzu iz tuo ūtra cylvāka volūdu, tai maņ ir īsaguojs. Tagad, prūtams, pret dažom volūdom ir nadaudz pasamainejuse attīksme, precizuok, na par volūdu, nu volūdu kai instrumentu, kuru var izmontuot kai ītekmiešonys reiku, i šaļtim es jau suoku padūmuot, kaidu volūdu komunikacejā izavielēt. Jemu taidu, kas ir neitraluokuo i gūdeiguokuo. Volūdai ir lels spāks.

Daiga: Vyss ir atkareigs nu kompanejis. Ir draugu grupys, kur tikai runojam latviski, ir draugi, pazinis, ar kurim runojam latgaliski, nu šod tod i puorsaslādzam iz latvīšu. Ka kompanejā ir kaids uorzemnīks, tod, prūtams, vysi puorsaslādz iz internacionalu volūdu – angļu. Ka kompanejā ir krīvvolūdeigais, nu dzims Latvejā, tod sarunvolūda ir latvīšu.

Baiba: Vysbīžuok puorsaslādzu iz volūdu, kurā dūmoju, i tei ir latvīšu, tai tys vīnkuorši ir nūtics. Latvīšu volūdai ir prevalejūša nūzeime, nu vyss atkareigs nu konkretuos personys. Maņ, pīmāram, ir vīns kolegis ar saknem nu Ludzys, i jis jau nu pyrmuos dorba dīnys ar mani runoj latgaliski, maņ tys ir napīrostai, jo dorbā es nalītuoju latgalīšu volūdu da šam. “Padūd maņ itū!” vīnā dorba pasuokumā es itam kolegim praseju, i prīšknīks tod īsasauce: “Eu, eu, izbeidziet šo, es neko nesaprotu!”

Juoņs: Vyss atkareigs kaida kompaneja, latvyskuo voi latgaliskuo. Tai jau vysod – kaids saprūt, kaids nazkū nasaprūt (tū es par čyulim). Kūpumā jau verās piec situacejis, bet parosti raunam latgaliski, ka nu galeigi kaids nasaprūt, tod jau paskaidrojam kas pa kam.

Voi, kab sasarunuotu latgaliski, ir izškireiga volūda, kaidā ūtrs aizsuoc sarunu?

Līna: Maņ redzīs, ka tys cīši atkareigs nu telpys, dīnys i konteksta. Ar vīnu paziņu ir pat dīnys, kod es sarunā varu paspēt nūmaineit treis volūdys, suokumā maņ tys ruodejuos interesna, nu tagad saprūtu, ka mes vīnkuorši tai komunicejam.

Ite ir svareigs ari pošviertiejuma vaicuojums. Runojūt par latgalīšu volūdu, atguodoju, kai puora godus atpakaļ, kod ar klasi braucem ekskursejā, vīns klasisbīdrs Bauskā palyudze īlikt salatus latgaliski, i maņ tūreiz ruodejuos, parkū jis tai dareja, tagad vysi zynuos, ka mes asam nu Latgolys. Tagad, ka maņ ir īspieja runuot latgaliski uorpus sātys voi raidejuma, es tū doru i maņ tei redzīs lela vierteiba. Kū vaira volūdys zyni, tū boguotuoks esi.

Edgars: Es dūmoju, ka veids, kaidā suoc sarunu ar cylvāku, ir svareigs, prūtams, kai Līna soka – vyss atkareigs nu konteksta, nu, ka tei vaira ir naformala vide i naformalys īpasazeišonys, tod es apmāram procentuali vīnaiži suoku sarunu kai latvyski, tai latgaliski.

Raugu suokt sarunu ar “Vasali!”, nu na vysod tys izadūd. Pa munam, tei ir taida kai etniskuos pīdereibys paruodeišona, jo tod vysi saprūt, ka esi latgalīts i puorejī latgalīši vysbīžuok atsasauc.

Formalā vidē, par pīmāru, vaļsts īstuodēs puorsvorā izmontoju latvīšu volūdu, nu niu vys bīžuok ari tī pyrmī vaicuojumi īt latgaliski. Ka pretim naatbiļd latgaliski, tod es puorsaslādzu iz latvīšu, lai ārtuoka komunikaceja. 

Juoņs: Nā, principā. Ir bejs, ka runoju i ar krīvvolūdeigū latgaliski, jis ar mani krīvyski. Parosti, ka ir svešs cylvāks, tod suoku latviski, tod jau vuords pa vuordam i teikam pi latgalīšu volūdys.

Baiba: Es asu taids tips, kas pīsalāgoj sarunu bīdram, maņ jau kursabīdri tū beja pamanejuši, pat akcentā tys ir izjiutams.

Par volūdys izvieli es pīkreitu, tys ir svareigi, kaidā suoc sarunu, nu es latgalīšu volūdu vaira izmontoju naformali, maņ ir gryuši runuot latgaliski profesionalā vidē. Nu leluokā kompanejā tei dažreiz ir taida identificiešonuos, ka tu atrūņ sovejūs.

Daiga: Ka tei ir latgalīšu volūda, kurā ar mani suok sarunu, tod nui, es atbiļžu latgaliski, ka latvīšu, tod – latvyski. Ka cylvāks suok ar mani runuot latvyski, nu es dzieržu, ka jis ar cytim runoj latgaliski, tod es puorsaslādzu ar jū iz latgalīšu volūdu.

Voi jius kaidreiz dūmuojot, ka latgalīšu volūda byus jiusu dorba volūda i ar tū varēsit peļneit naudu, kai tagad, vodūt raidejumu “Pīci breinumi”?

Juoņs: He he, patīseibā es ar latgalīšu volūdu peļneju jau nu bierneibys. Sovulaik, kab es runuotu ar mamu latgaliski, jei maņ par dīnu, kū ar jū runuoju latgaliski, deve Kinder Surprise ūlu. Suokumā tei beja cīši loba olga.

Edgars: Nikod! Patīseibā es tikai tagad tū saprotu.

Līna: Nā! Deļ mane pošys tys ir lels puorsteigums, ka es jau trešu godu publiski runoju latgaliski i tū vēļ puorraida radejā. Parosti soka, ka tamā volūdā, kurā labi var pajūkuot, tū cylvāks zyna nu sirds. Maņ latgaliski jūkuot ir gryuši, nu, ka es zynu itū volūdu, tys ir lels bonuss.

Ir forši nūvāruot, saukšu tū tai, latgalīšu volūdys renesansi. Maņ pateik, kai latgalīšu volūda teik popularizāta, par pīmāru, caur jaunīšu raidejumu, plānuotuoju, caur “BezPVN” muzyku. Redzīs, ka latvyski dzīsmem nabyutu taida šarma, tuos naskanātu tai, kai skaņ latgaliski, ari tī vuordi da cylvāku naaizītu. Tys, kū mes dorom ar raidejumu… Mes na tikai izzynojam cylvākus, bet ari poši sovu kulturu i ļaunam volūdai i viesturei, kas īt kūpā ar volūdu, dzeivuot i atsateisteit ari myusu dīnuos. Tei ir tei nauzspīstuo volūdys izmontuošona, kas naroda pretefektu tuos lītuošonā.

Baiba: Vyspuor nā! Es nabeju dūmuojuse, ka es pīsapeļneišu voi profesionali sevi realiziešu caur latgalīšu volūdu, partū ka es sevi nasauktu par lelu latgalīšu volūdys patriotu. Ni par tū, ka maņ napateik voi es narunoju, nu es muoksleigi tū naintegreju sovā vidē, jei dabeigi tī dzeivoj, es nivīnam nauzspīžu voi poša apzynuoti narunoju ar cytim latgaliski. Ir nūteiktys cylvāku kategorejis, kas tū uzspīž, nu, pa munam, vyss, kas ir muoksleigs, navar īsadzeivuot dabeigā vidē.

Daiga: Nā, nikod nadūmuoju par peļnis īspiejom, izmontojūt latgalīšu volūdu. Žāļ, ka tai, jo taišni volūdys zynuošonys maņ deve vareibu pīpiļdeit vīnu nu sovu mozūs dzeivis sapynu – struoduot Latvejis Radejā i vadeit radejis raidejumu “#5breinumi”.

Jius ar bārnim runojat voi plānojat runuot latgaliski?

Edgars: Mums saimē beja taida nūruna, ka kotrys runuos ar meitu sovā volūdā, maņ tei ir latgalīšu, sīvai – portugaļu. Maņ jau nu suokuma beja taida nūstuoja, ka es runuošu latgaliski, ar dūmu, ka latvīšu jei taipat īsavuiceis kai bārnuduorzā, tai školā, i krīvu volūda ari bīži viņ īt komplektā.

Baiba: Es runoju ar bārnu latvyski, jo puorsvorā itū volūdu ari lītoju kasdīnā, muoksleigi naraugu runuot latgaliski, ka maņ vajadzātu argumentēt, tod kotrys vacuoks dora tai, kai jam ir ārtuok. Paziņu lūkā ari ir bejušys naveiksmeigys situacejis ar “volūdu kokteili”, kod bārns īsuok īt duorzeņā i jam ir gryuši komunicēt. Ir apsveicami, ka vacuoki var volūdu nūdūt tuoļuok, nu tys atkareigs nu personeiguos situacejis. Vīnu reizi ar veiru aizdevem jai vaicuojumu, voi jei ir latgalīte, jei ar plotom acim īsasauce: “Nā!” Ir jau latgaliskī vuordi, kuri īsasakņoj paaudzēs. Es dūmoju, ka tys vyss atīs pats, jei brauc iz buļbu tolkom, jei nūteikti pīsaklauseis foršuos atzinis nu babu i dzedu. Ari pošai nu vacvacuoku ir aizagivušs dažaidi taidi izteicīni kai “Vo, Valdinīkūs!”, “Pa vysu Makašānu pogostu” i cyti. Latgalīšu volūda maņ reizem aizstuoj nacenzātū leksiku. 

Portals lakuga.lv vaicoj sovim skaiteituojim

Portals lakuga.lv par latgalīšu volūdys lītuošonu sadzeivē apvaicuoja ari sovus skaiteituojus taiduos socialū teiklu platformuos kai Twitter, Facebook i Instagram. Apkūpojūt cylvāku atbiļdis, secynojam, ka situaceja varātu byut lobuoka, nu, par laimi, tei nav dramatiska, i lela daļa myusu skaiteituoju sadzeivē latgalīšu volūdu kai mutiski, tai rakstiski izmontoj i šaļtim tei ir nūdereiga ari profesionalajā vidē.

Kūpā tyka apvaicuots 81 respondents i rezultati ir itaidi: