Rokstu sataveja: Egita Terēze Jonāne (Vietējā Latgales Avīze)

Nu ituo gods maja zam Latgolys planavuošonys regiona spuorna struodoj “Europe Direct Dienvidlatgale” centrs, kas sovu darbeibu aizsuoce ar vierīneigu “Vidis dīnu Daugovpilī” i itūšaļt eistynuojs viertini dažaidu nūtikšonu izgleiteibys, uzjiemiejdarbeibys i jaunuotnis sferuos. Niu centrs, sasadorbojūt ar “Vietējā Latgales Avīze” i portalim grani.lv i latgalīšu kulturys ziņu portals lakuga.lv, kab padareitu plašuokys Latgolys īdzeivuotuoju zynuošonys par Eiropys Savīneibu (ES) i īpazeistynuotu ar dažaidu sferu puorstuovim Latgolā, skaiteituojim pīduovoj sarunu cyklu “Eiropys pādi latgalīšūs”.

Itūreiz par leivuonīti, Latgolys myusdīnu amatnīceibys vierteibu sātys vītys “Handmade Latgola” idejis autore i vierzeituoja Marika Rudzīte-Grike (Rudzīte-Griķe) ar stuostu par Eiropys davumu mozajam i videjam biznesam. Marikys moto – dzeivuot breiveibā, kusteibā i atteisteibā!

Marika atguodoj, ka Eiropa pyrmū reizi “sapāduoja” juos dzeivi tod, kod jai i nabeja vēļ dūmys byut par uzjiemieju, respektivi, jei īsasaisteja Eiropys Savīneibys finansātajā i Jaunuotnis storptautyskūs programu agenturys administrātajā programā “Jaunuotne darbeibā”, kū šudiņ zynim kai “Erasmus+” programu.

“Tūlaik es poša kai jaunīts braucu iz dažaidom vaļstim, i tod dzeivis skots pasavēre plotuoks. Saprotu, ka pasaulī nav viņ tovs cīms, pogosts, piļsāta, vaļsts, ka pasaulī ir daudzi kuo vaira i interesanta. Nu tuo laika maņ ir lela gribiešona vuiceitīs, kruot pīredzei, īsadvesmuot nu cytu i ceļuot, kab atteisteitu lītys iz vītys – tei ir maņ kai dīniškuo maize,” soka Marika.

Piečuok Marika ar muosu īsastuoja Leivuona biznesa inkubatorā, kas dorbojās ar mierki atbaļsteit jaunūs uzjāmumu sataiseišonu, izveiduoja sou mozū uzjāmumu SIA “ArGaumi” i ražuoja lyna izstruoduojumus sātai. Marika stuosta: “Ka nabyutu biznesa inkubatoru programys i ka nabyutu Latvejis Investiceju i atteisteibys agenturys storptautyskuos konkurētspiejis palelinuošonys atbolsta programys, kū finansēja Eiropys Savīneiba, tod mes pošys – tik par sovu naudu – eistyn navarātu nūbraukt iz storptautyskajom izstuodem Vuocejā, Suomejā, Italejā. Tys beja nūzeimeigs atbolsts i miļzeiga pīredze, jo mes īpazynom uorvaļstu kolegu biznesa sferys i modeļus. Tu redzi, ka taidam pošam vuocu, greku i cytu vaļstu uzjiemiejam dorbs ari “ir ar gorūzu”, tu saprūti, voi pats gribi itū maizis gorūzu voi gribi meklēt cytu modeli. Mes izavēlējom cytu biznesa modeli. Deļtuo uzjāmums “ArGaumi” piec desmit darbeibys godu ir puordūts, tys dzeivis pūsmys ir golā ar pīredzi, zynuošonom i atkluosmem, kū izmontoju jaunajūs projektūs.”

Itū pīredzi, zynuošonys, atkluosmis Marika īguļdeja jaunā projektā “Handmade Latgola”. Te iri Latgolys amatnīceibys vierteibu sāta, niu jau vaira nakai 30 Latgolys amatnīku sadarbeibys platforma, kas topuse ar Marikys saimis, lobu apleicejūs ļaužu i Eiropys Savīneibys programu atbolstu.

“Nu es eistyn nagrybu “dasīt” sevi tik vīnai voi ūtrai sferai. Šudiņ dūmoju jaunys biznesa idejis, kurom, vysā tycams, otkon meklēšu Eiropys Savīneibys atbolsta. Nav juosabeist byut Eiropys sapādūtam. Tys var byut vīns projekts vysam myužam voi vairuoki projekti dažaiduos sferuos. Tei ir kotra poša izvēle,” izsver Marika.

“Europe Direct Dienvidlatgale” centra vadeituojs Oskars Zugickis soka: “Latgolys plānuošonys regions vaira nakai desmit godu ar ES atbolstu organizej pasuokumus amatnīkim, sātā ražuotuojim i uzjiemiejim. Vīns nu popularuokūs ir Latgolys dīna Reigā, kod regionu var īpazeit car latgalīšu dorba tykumu i dzeivisprīcu. Tikū, septembra golā, taids beja Latvejis Etnografiskajā breivdobys muzejā – itaidys idejis nūtikšona “Latgalīši Reigā brauc!”, kurā pīsadaleja 50 uzjāmumu nu Latgolys.”

Vysu jaunuokū informaceju par “Europe Direct Dienvidlatgale” darbeibu i pakolpuojumim var izzynuot Facebook.com/EuropeDirectDienvidlatgale i sātyslopā lpr.gov.lv.