Rokstu sagataveja: portals lakuga.lv

Ūtardiņ, 18. oktobrī, vaļdeiba atbaļsteja Ministru kabineta bolvu i Atzineibys rokstu pīškieršonu personom i organizacejom par nūzeimeigu īguļdejumu vysaiduos jūmuos. Ministru kabineta Atzineibys rokstu sajims ari Nautrānu vydsškolys školuotuoja, Latgalīšu volūdys, literaturys i kulturviesturis školuotuoju asociacejis (LVLKŠA) vadeituoja i Latvīšu volūdys instituta pietneica Veronika Dundure par nūzeimeigu īguļdejumu latgalīšu rokstu volūdys apvuiceibā, populariziešonā i vuiceišonys atteisteišonā, kai ari latgalīšu kulturviesturis zynuošonu nūdūšonā tuoļuok, styprynojūt latgaliskū identitati Latvejā.

Kai intervejā itūvosor žurnalam “A12” stuosteja Veronika Dundure, jei kai školuotuoja latgalīšu volūdai i literaturai vaira pīsavārsuse paguojušuo godu symta 80. godūs, LVLKŠA Dundure voda nu 2001. goda. Pasasokūt juos dorbam, jau vaira nakai 20 godu teik organizāts skotuvis runys konkurss “Vuolyudzāni” i latgalīšu rokstu volūdys i kulturviesturis olimpiade. Nu 2013. gods olimpiadei ir vaļsts atkluotuos olimpiadis statuss. LVLKŠA regulari organizej dažaidys konferencis, seminarus, skaidroj institucejom par napīcīšameibu latgalīšu volūdu vuiceit školuos, taipat Rogovkā nu 2003. goda dorbojās Latgalīšu volūdys i kulturviesturis metodiskais centrs.

Ministru kabineta Atzineibys rokstu pasnādz, kab izsaceitu vaļdeibys atzineibu privatpersonom, t.sk., uorvaļstnīkim, par izcilim sasnāgumim tautsaimisteibys, zynuotnis, izgleiteibys, veseleibys, vidis aizsardzeibys, vaļsts puorvaļdis, kulturys, sporta i vaļsts aizsardzeibys jūmā.

Īrūsynuojumu par Ministru kabineta Atzineibys roksta pīškieršonu Apbolvuošonys padūmē īsnādz Ministru prezidents, ministri, pošvaļdeibu vadeituoji, Latvejis Pošvaļdeibu savīneibys prīšksādātuojs voi cytu navaļstisku organizaceju vadeituoji. Ministru kabineta Atzineibys rokstu Ministru kabinets nūdybynuoja 1995. gods aprelī. Tū svineigā ceremonejā pasnādz nūzaris ministrs voi Ministru prezidents, ka jis bejs Atzineibys roksta īrūsynuotuojs.