Rokstu sagataveja: portals lakuga.lv

Bīdreiba “Hronologeja” izdavuse Ligijis Purinašys ūtrū dzejis kruojumu “pierobežas”, kurā pameišus apkūpuoti 2020.-2021. godā radeitī teksti latgalīšu rokstu i latvīšu literarajā volūdā, informej bīdreibys puorstuovs Kaspars Strods. Gruomota “pierobežas” ir mieginuojums tyvynuot obejis rokstu tradicejis, aicynojūt byut ījiuteiguokim i īkļaunūšuokim, kai ari pīgrīžūt viereibu pīrūbeža fenomenam.

Dzejis kruojumā publicātī teksti hronologiskai īsakļaun t.s. pandemejis laika literaturā. Sovpus ideja par tū, ka dzejis kruojums byus bilingvals, rodusēs piec vairuoku plašuokā sabīdreibā izskaniejušu diskuseju, kas saisteitys ar latgalīšu rokstu volūdys lītuojumu – Vaļsts volūdys lykums paradz, ka latgalīšu rokstu volūda ir latvīšu volūdys viesturiskais paveids, kas nūzeimoj, ka tei ir daļa nu latvīšu volūdys.

“Dūmojūt par itū gruomotu tuos suoku stadejā, mes jau bejom izsprīduši, ka tai juobyut provokativai, taidai, kas aicynoj dūmuot par apleik nūteikūšū. Tekstūs jiutama gribiešona izaraut, puorkuopt rūbežus: laika, telpys, kermiņa rūbežus. Tok tys ir ari viestejums par lītom, procesim, kas nūteik apleik, laikā pyrma i piec rūbežu puorkuopšonys,” atkluoj projekta vadeituojs Kaspars Strods.

Dzejis kruojuma vizualuos koncepcejis autors ir Raivis Nikolajevs, kas pīduovoj dzili intimu redzīni iz vidis, tekstu i autoris mejīdarbeibu sovā storpā, ilguokā laika periodā sekojūt leidza dzejneicys īškejom i uorejom puormaiņom. Vizualais materials veiduots, sapludynojūt fotografejis i ilustracejis žanrus, kai ari izmontojūt autoris kermini kai muokslys dorba plakni, aktualizejūt tū, ka nu muokslys, leidzeigai kai nu tetoviejuma, navar vīglai i nasuopeigai atsabreivuot. Gruomotys redaktors ir Valentins Lukaševičs, korektore – Laura Melne. Portala lakuga.lv redaktoris i kruojuma korektoris Laurys i Ligijis Purinašys itūvosor nūtykušu sarunu par kruojumu var puorskaiteit ITE.

Dzejis kruojumu plānuots duovuot Latgolys bibliotekom, kai ari goda beiguos teik plānuotys sasatikšonys kluotīnē ar gruomotys autori. Gruomota “pierobežas” izdūta, pasasokūt Vaļsts Kulturkapitala fonda i privatu zīduotuoju atbolstam. Nu 1. novembra tū byus īspiejams īsaguoduot “Jānis Roze” internetveikalā vysā Latvejā.

Ligija Purinaša (1991) ir dzejneica, kas, saglobojūt pošys radeitū autentiskumu, dzeivoj i struodoj Latgolys regionā. Juos pyrmais dzejis kruojums “Sīvīte” (2019) izapeļneja sabīdreibys īviereibu i godu piečuok, 2020. godā, juos teksti tyka īkļauti bilingvalajā dzejis antologejā “Pādejais Modeļs/ The Last Model” (tulk. Jayde Will), kas tyka izdūta Londonā.