Rokstu sagataveja: portals lakuga.lv

Ar ituos nedelis īsacejumu rokstu gribim jius īpazeistynuot ar Latgalīšu kulturys ziņu portala lakuga.lv jaunū žurnalisti Martu Puzāku. Marta studej žurnalistiku Reigys Stradiņa universitatē, kaidu laiku jei beja portala uorštata autore, nu niu Martys rokstus byus vareiba skaiteit bīžuok. Itamā nedeļā Marta aicynoj dareit lobus dorbus sev i cytim.

Nūlīc sveceitis kopūs

Uorzemnīki smej, ka mums, latvīšim, kopu kultura ir cīši tyva i svareiga. Tai nu tys ir. “Dead people festival” aba kopussvātki vosorā, kod gostūs sabrauc saime nu Latvejis tuoļuokūs punktu i teik taiseitys ballis i pasiediešonys pi golda. Ari niu, oktobra i novembra mieness nūzeimej veļu laika suokšonūs – skaita, ka niu myrušūs dvēselis staigoj pa zemis viersu, tok mums tuos ir juopagūdynoj. Tuo īmesļa dieļ teik reikuoti sveceišu vokori kopūs. Veids, kai tymsajā goda periodā īdegt līsmeņu par lobu aizguojušūs pīmiņai. Nūgiuņ steidzeigajā kasdīnys rutinā breivu šaļti, kab nūbrauktu da kopu i sakūptu tyvinīku kopavītys. Pasakavej ar dūmom tī i nūlīc sveceiti, syutūt kosmosā lobys dūmys, kab dreižuok pasauli puorjam mīrs i labesteiba!

Kab goda tymsuokais laiks nasaruodeitu tik dryums, aicynojam tū aizpiļdeit ar humoru nu Facebook lopys “Latgaļu humors i dzeivis gudreibys”, ite vīns mīms par sveceišu vokoru:

Taupi elektreibu i uzaluodej nu sveču gaismys

Itūšaļt vysi asam cīši sasatraukuši par gaidamajim komunalajim riekinim, raugom saraut jūstys i īrūbežuot sevi sovūs parodumūs. Tok, navajag zaudeit optimisma – meklejam alternativys! Niu juotaupa elektreiba – īvīs sovūs parodumūs koč vīnu vokoru sveču gaismā. Voi naskaņ romantiski? Aizdedz aromatiskys sveceitis ustobā i tu sajussi, ka pasaruod īškejs mīrs i autentiska energeja. Pavodi laiku ar sevi – klusums reizem ir tys, kas paleidz atrast atbiļdis iz svareigim vaicuojumim. Ļaunīs tam! Nūlīc molā telefonu, izslēdz televizoru i pajem kaidu seņ aizmierstu, plauktā puteklim apkluotu gruomotu voi puorsaver kaidu vacū karteņu albumu. Tys uzdzan pateikamys sajiutys! Ka esi ar saimi, tod nūteikti uzspielejit kaidu golda spieli sveču gaismā. Tiks taupeita i elektreiba, i ari jautri pavadeisit dryumūs rudiņa vokorus.

Paleidzi Ukrainai!

Lai kai grybātūs, kab vysim vyss byutu labi, vys tik tai vēļ pagaidom nav. Ukrainim vys vēļ ir vajadzeiga paleidzeiba – na tik morali, bet ari materiali. Itūšaļt tyukstūšom ukraiņu škārsoj Krīvejis – Latvejis rūbežu, kab tyktu Eiropā. Jim ir cīši vajadzeigys pyrmuos napīcīšameibys precis – higiena, puortyka, syltys drēbis, kaids dečs voi pleds, ar kū sasasiļdeit nu oktobra soltumu, cikom iz rūbeža gaida sovu transportu. Izdori lobu dorbu –  nūzīdoj! Zīduot var, rokstūt bīdreibai “Tavi Draugi” voi pošim aizvadūt lobumus iz rūbežkontrolis punktim Grebnevā, Terehovā, Silinē i Vīntuļūs. Kūpā mes asam spāks!

Lai produktiva i lobim dorbim boguota nedeļa!