Rokstu sagataveja: portals lakuga.lv

Īmūt pa Cāsu vacpiļsātu pošā piļsātys vydā iz Reigys īlys aceiguokī pamaneis viers golvys pleivojūšu Latgolys karūgu – tys īzeimoj izstuožu zālis-veikala “Museus” vītu. Izstuožu zāli-veikalu ar gleznom, amatnīceibys dorbim i informaceju tuos saiminīki Misānu saime veidoj kai vītu Latgolys muokslai.

Izstuožu zāle “Museus” ir ituo gods jaunums Ciesīs – attaiseita maja suokumā, niu pīktdīnem i sastdīnem da Zīmyssvātku tī apsaverama jau ūtrei izstuožu kolekceja “Latgolys kruosys” ar Ilzis Griezānis, Vēsmys i Aivara Ušpeļu, Māra i Juoņa Vogulu, “Pīterkolna” i cytu muokslinīku gleznīceibys, keramikys i juvelerdorbim.

Portals lakuga.lv raudzeja nūskaidruot, aiz kuo itaida vīta Ciesīs rodusēs i kas ir tuo saiminīks. Izaruod, ka izstuožu zālē “Museus” saiminīkoj Misānu saime – Ainārs i Ilona Misāni, kurī īt nu Salacgreivys, bet niu jau pīktū godu dzeivoj Ciesīs. Ilona Misāne skaidroj: “Itei galereja ir muna veira Aināra sapyns i projekts. Juo saknis ir Latgolā, vacvacuoki īt nu Aglyunys pusis. Koč i jis pats audzs Salacgreivā i niu dzeivoj Ciesīs, itys ir sapyns, kurū jis gribēja pīpiļdeit.”

Izstuožu zālis saimineica stuosta, ka ni jai, ni veiram nav īprīškejis pīredzis itaida veida vītu taiseišonā i pošim ari nav saisteibys ar muokslu – veirs Ainārs ir jiurinīks, bet jei poša struodoj bārnuduorzā. Niu navarūt tai precizi pasceit, cik seņ itaids sapyns Aināram Misānam bejs, nu vys tik jau paseņ vydā siediejs, koleidz eistajā šaļtī sasaslāguši vysi apstuokli tuo pīpiļdeišonai. Saime tykuse pi itūs telpu, īpasazynuse ar Vēsmu i Aivaru Ušpelim, Aigu Dātavu, kurī vysi bejuši cīši atsauceigi. Tai pārnejuo gods vosorā suocēs galerejis organiziešonys dorbi, bet jau ituo gods pavasarī tei atkluota.

“Pyrma goda braucem gostūs pi Vēsmys i Aivara ar ideju, bejom pi Vogulu i Aigys Dātavys – vysi beja gotovi sasadorbuot. Pošim tys sovā ruodīs natycamai – niu vysus muokslinīkus, kurū dorbi ir apsaverami i nūpierkami galerejā, pazeistam personeigi. Karūga īdvasma mums īt nu Vēsmys i Aivara Ušpeļu sātys – jim beja i mums ari taida sasagribieja. Galerejā pīsaturim pi Latgolys muokslinīku i tai ari plānojam turpynuot,” stuostu par izstuožu zālis tapšonu papyldynoj Ilona, kurai ari pošai Latgola ir īpasatykuse i tī cīši labi jiutūtīs.

Cikom Ilona i Ainārs Misāni ar saimi galerejā “Museus” vysu dora poši – īkuortoj izstuodis, sagaida gostus, uztur socialūs teiklus i dora vysus kasdīnys dorbus. Gondreiž vysus galerejā radzamūs dorbus kotrys grybātuojs var nūpierkt, viņ atseviški dorbi ituo breiža ekspozicejā nateik puordūti i baudomi tik iz vītys.

Vīna nu muokslinīku, kurūs dorbi niu apsaverami i nūpierkami izstuožu zālē “Museus”, ir gleznuotuoju apvīneibys “V.I.V.A.” daleibneica, gleznuotuoja, Ilze Griezāne. Ilze par sovu dorbu tikšonu Ciesīs stuosta: “Koč i galereja “Museus” geografiski ir Ciesīs, tuos saiminīks ar sirdi i dvēseli ir Latgolā. Misānu saime atroda Ušpeļus i tuoļuok jau Vēsma Ušpele īsaceja uzrunuot ari mani. Itūšaļt galerejā da Zīmyssvātku var apsavērt munu dorbu izlasi, kurā pamatā ir rudiņa i zīmys laika ainovys. Vysod jau gribīs radeit izstuodem kaidus jaunus dorbus, nu na kotru reizi tys saīt. Itūreiz speciali “Museus” vys topa vīns jauns dorbs – vasareiga Daugovys ainova.”

Ilzis Griezānis gleznys i cytu Latgolys muokslinīku dorbus galerejā “Museus” var apsavērt pīktdīnem i sastdīnem nu 12.00 da 18.00. Vaira par izstuožu zāli “Museus” var izzynuot tuos socialūs teiklu profilūs Instagram i Facebook.

Fotogalerejā – īsavieršona muokslys galerejā “Museus” Ciesīs, foto Edeite Husare/portals lakuga.lv.