Rokstu sagataveja: bīdreiba “LgSC”

Vīna nu aktivuokūs i radzamuokūs latgalīšu kulturvidis organizaceju i portala latgalīšu kulturys ziņu portala lakuga.lv saiminīks – bīdreiba “LgSC” – iz prīšku dorbuosīs ar zeimynu “Latgalīšu kulturys kusteiba “Volūda””. Jaunais zeimyns ar saukli “Volūda, kas saviļņoj” precizuok raksturoj sajiutu i procesus, ar kaidim aizrauteigi struodoj bīdreiba – vysu dorbu pamatā vaira voi mozuok ir latgalīšu volūda i ar tū saisteitais vysaižūs aspektūs.

Bīdreiba “LgSC” vysu sovu darbeibys laiku ir vīna nu aktivuokūs i spylgtuokūs latgaliskuos kulturvidis organizaceju, kas eistynoj i roda vysaižus latgaliskūs dorbus. Leluokais bīdreibys kasdīnys dorbs ir latgalīšu kulturys ziņu portals lakuga.lv, kai ari latgalīšu rokstu volūdys tīšsaistis nūdarbeibys, akceja “Latgalīšu volūdai draudzeiga vīta”, jaunīšu seminars “Atzolys”, konkurss “Latgolys prozys skaitejumi”, latgalīšu literaturys i cyta veida izdavumu izdūšona (bārnu dzejūļu i dzīšmu kruojums “Vuškeņa iz pļovys”, Egitys Kancānis “Syltuo mola”, Annys Rancānis jaunuokī dzejis kruojumi, latgalīšu dzīšmu kruojums “Muna dzīšmu gruomota i cyti), sadarbeibā ar Latvejis Radejis Latgolys studeju padareitī Ilzis Spergys stuostu kruojuma “Dzeiveiba” radejis lasejumi i latgalīšu rokstu volūdys diktats, taipat folklorys kūpa “Ceidari”, “WhatsApp” digitaluos latgaliskuos uzleimis i cyti dorbi, kurūs vydā nūtikšonu, diskuseju reikuošona, volūdys izpiete, iniciativys i īsasaisteišona nūrisēs, kur juopuorstuov latgaliskuo kulturvide.

Bīdreibai “LgSC”, kurā apsavīnuojuši latgaliskuos kulturvidis entuziasti nu dažaidu Latvejis vītu i kurei īprīšk beja zynoma kai “Latgolys Studentu centrs”, ir senejis idejiskuos saknis, nu oficiali kai bīdreiba pīregistrāta 2005. godā. Nu tuo laika vaira voi mozuok aktivs bejs bīdreibys dorbs izvierzeitūs mierku sasniegšonai. 2020. godā bīdreiba pamaineja nūsaukumu nu “Latgolys Studentu centrs” iz abriviaturu “LgSC” – taids bīdreibys apzeimiešonai sabīdreibā kasdīnā tyka lītuots i īprīšk. Pamatuojums itaidom puormaiņom, beja tys, ka sovulaik bīdreibu dybynuoja jaunīši i studenti, kurī pīauga reizē ar organizaceju, turpynuoja dorbuotīs, taipat vaira nanūtyka tik aktiva paaudžu maiņa, kai ari pasameja pošys bīdreibys dorbuošonuos veidi, vierīņs i interesis. Tys vyss nūvede pi vaicuojuma, voi “studentu” vēļ arviņ ir “studentu”, jo padareitais i mierki seņ jau beja puorauguši nūsaceitū “studentu” leimini.

Nu ar laiku logiskys tyka vaicuojums, voi abriviatura “LgSC” ir lobuokais atrastais rysynuojums. Bīdreibys ituos šaļts vadeituoja Edeite Husare stuosta: “Dūmys par tū, voi vēļ arviņ asam “studentu centrs” beja seņ, aiz tuo ari oficiali atsasaceit nu studentu byušonys ruodejuos logiskys sūļs i taipat vysur tykom saukti par “LgSC”. Nu tod saguoja sasadūrt ar tū sabīdreibys daļu, kas nazyna bīdreibys viesturi, agruokū nūsaukumu i abriviatura raiseja vaicuojumus, kas tod tys ir. Ituo izaicynuojuma rysynuošonu redzējom ari kai vīnu nu sūļu bīdreibys kapacitatis styprynuošonā – saprast i atrast bīdreibys zeimynu i publiskū tālu, kas vaira nalyktu aizdūt vaicuojumus ni sovā vydā, ni apleik. Pamatā jau dorbi i gribiešona dareit nu nūsaukuma pameišonys nasamaina, nu myusu dīnuos styprys zeimyns ir ari daļa nu kasdīnys publicitatis i veids, kai sabīdreibai skaidri paruodeit, kas tod bīdreiba ir i kū dora.”

Bīdreibys jaunuos identitatis radeišonai tyka pīsaisteits vīns nu Latvejis lobuokūs reklamys sferys specialistu Raimonds Platacis, kurs pats niu otkon dzeivoj Latgolā, kai ari taišni Latgola i latgaliskais kai zeimyns i tāls ir vīns nu juo pādejūs godu interešu objektu. Kai individualuos sarunuos, tai diskusejuos ar bīdreibys bīdrim, viertejūt da ituo dareitū i organizacejis tuoļuokū strategeju, roduos zeimyns “Latgalīšu kulturys kusteiba “Volūda””, kas simboliski paruoda tū, ka bīdreiba ir īkustynuojuse, aizsuokuse cīši daudzi latgaliskūs iniciativu i turpynoj tū dareit iz prīšku. Pi zeimyna vizualizacejis struoduojuse grafiskuo dizainere i ari tetoviešonys meistare Elīna Zelča.

Zeimyna idejis autors Raimonds Platacis par dorbu pi tuo stuosta: “Izstruodojūt bīdreibys jaunū identitati, mums beja svareigi izavaireit nu banalu elementu repliciešonys. Gribiejom saprast, kas ir tī simboli, kas spiej iznest volūdys augšuokuo funkceju, naviņ runuošonu i raksteišonu, koleidz tykom pi “viļneiša”. Viļņuotais elements bīdreibys jaunajā logotipā simbolizej kusteibu, kas aizasuoc kai dūma kaida cylvāka golvā ite, Latgolā, i, pīdzeivojūt sovu eistynuošonu, īkustynoj cytus ļauds Latgolā, Latvejā i vysā pasaulī.”

Reizē ar zeimyna maiņu bīdreiba ari attaisa zīduošonys platformu-veikalu voluda.lv, kab pīsaisteitu atbolstu vēļ vaira latgaliskūs dorbu īkustynuošonai, aizsuokšonai i padareišonai. Tī ir vareiba atbaļsteit ari latgalīšu kulturys ziņu portala lakuga.lv dorbu. Vaira par bīdreibu i jaunū zeimynu ite: voluda.lv/byut.

Bīdreibys vadeituoja Edeite Husare soka: “Jauna zeimyna radeišona gondreiž vysod nav vīnkuoršs i eiss process, deļ tuo mes asam cīši prīceigi, ka sasarunojūt, diskutejūt, ari švuorbojūtīs i daudzi analizejūt, ir rodīs itys zeimyns “Latgalīšu kulturys kusteiba “Volūda””, kas precizi paruoda tū, kas ir bīdreiba, tuos dorbi i nūzeime. Mes vysod asam bejuši jaunu ideju aizsuocieji, īkustynuotuoji, pasamejuši poši i mainejuši procesus ari latgaliskajā, bet vysa centrā vysod bejuse voludā, ar kuru cyts pīdzims, cyts uzaudzs, kura roda tū saviļņuojumu i gribiešonu dareit tuoļuok. I vēļ maņ personeigi cīši lela prīca, ka Latgolys regions var! Ari Latgolā iz vītys ir specialisti – zeimynu radeituoji i vizualī veiduotuoji – ar Latvejis i pasauļa leimiņa pīredzi, ar kurim kūpā radeit itaidus jaunus stuostus. Cikom teik pabeigti aizsuoktī projekti, bīdreiba vys juridiski saglobuos ari nūsaukumu “LgSC”, nu jau niu publiskajā dasacejumā iz prīšku īs kai Latgalīšu kulturys kusteiba “Volūda”.”

Kab izzynuotu vaira par tū, kaidi beja bīdreibys izaicynuojumi identitatis mekliešonā, par jaunuo zeimyna tapšonu i par Latgolu i latgaliskū zeimynūs kai taidūs, aicynojam iz tīšsaistis sarunu ar bīdreibys vadeituoju Edeiti Husaru i zeimyna “Volūda” veiduotuoju Raimondu Plataci catūrtdiņ, 10. novembrī, 20.00 tīšraidē Latgalīšu kulturys kusteibys “Volūda” profilā socialajā teiklā “Facebook”.

________

Zeimyna maiņa ir vīna nu projekta “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” aktivitašu. Projekts tyka eistynuots nu 2021. gods 1. maja da 2022. gods 31. oktobra i sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja.