Latgolā teik veiduots dzīšmu montuojuma kulturys ceļš
Rokstu sagataveja: portals lakuga.lv
1987. godā Eiropys Padūme suoce projektu “Kulturys celi” (“Cultural routes”), kura mierkis ir atspīgeļuot vysaidu Eiropys vaļstu i kulturu montuojumus, snādzūt pīnasumu kūpeigajam kulturys montuojumam. Ar programys “Kulturys celi” paleidzeibu Eiropys Padūme pīduovoj kulturys i turisma puorvaļdeibys modeli. Sertificātī kulturys modeli teik vārtāti reizi trejūs godūs i jaunizveiduotim “Kulturys celim” ir juoatbylst vairuokim kriterejim. Pādejā sertifikacejis cyklā ir apstyprynuots ari jauns “Dzīšmu montuojuma Kulturys ceļš”, kurs izīt caur Leitovys, Latvejis, Igaunejis i Suomejis pīrūbežu. Latvejā jaunais “Kulturys ceļš” īt tik caur Latgolu.
Jaunais “Dzīšmu montuojuma Kulturys ceļš” ir viņ tikū apstyprynuots projekts, deļtam prīškā vēļ gaidoms lels dorba cielīņs leidz golam izstruodojūt sātys lopu singingroute.com, pastotūt informativuos zeimis pi turisma objektu, kas ir īkļauti itymā ceļā, i eistynojūt jaunuo “Kulturys ceļa” populariziešonys pasuokumus.
Kai stuosta Latgolys Turisma asociacejis puorstuove i Ludzys TIC vadeituoja Līga Kondrāte: “Vēļ ir cīši daudz kas dorams, vys ir labi, ka Latgola kai turisma golamierkis pasaruoda arviņ vaira i arviņ dažaiduokuos vītuos i veidūs.”
Nu Latgolys “Dzīšmu montuojuma Kulturys ceļā” ir īkļauti dažaida veida objekti – kai tī, kas tīšā veidā saistami ar tradicionaluos dzīduošonys montuojumu, tai ari tī, kas vīnkuorši atbylst Latgolys tradicionalajam montuojumam. Kūpumā Latgolys pūsmā ir vaira nakai 20 dažaidu vītu, dažys nu tūs: Bolvu nūvoda muzejs, Stompaku pūra styga Bolvu nūvodā, Namaterialuos kulturys montuojuma centrs “Upīte”, Ludzys Amatnīku centrs, Gunāra Igauņa muzykys instrumentu darbneica i muzejs Rēzeknis nūvodā, pūdnīki Stanislavs Viļums i Viola Anna Bīriņa Rēzeknis nūvodā, folklorys kūpa “Olūteni” Kruoslovys nūvodā, bīdreiba “Teira Latgolys muoksla” Ondrupinē, Naujinis nūvodpietnīceibys muzejs i Slutišķu vacticeibnīku sāta Augšdaugovys nūvodā i cytys vītys.
“Dzīšmu montuojuma Kulturys ceļa” projekta aktivitatem var sekuot leidza sātys lopā singingroute.com, Facebook lopā i Instagram lopā. Sovpus cytus taida veida “Kulturys ceļus” var apsavērt ITE.
