Rokstu sagataveja: portals lakuga.lv

Rēzeknis Tehnologeju akademeja (RTA) īsasaistejuse storptautyskā projektā, kurā ar četrim partnerim nu Portugalis, Niderlandis, Norvegejis i Igaunejis izstruoduos myusdīneigu elektronisku vuceibu leidzeikli ar dažaidim aizdavumim školānim četruos Eiropys mozuok lītuotajuos (reizē apdrautātajuos) volūduos. Kab sataiseitu piec īspiejis efektivuoku vuiceibu leidzekli, školuotuoji i nūdarbeibu vadeituoji, kuri vuica latgalīšu volūdu, aicynuoti aizpiļdeit anketu par latgalīšu volūdys vuiceišonu, informej projekta puorstuove, RTA docātuoja Sanita Martena.

Kai stuosta projekta puorstuove Sanita Martena, projekta “Tīseibys iz pīdereibu i lidereiba: celi latgalīšu volūdys lītuojumam školuos (OWL+)” (Ownership and Leadership: Pathway for (Endangered) Languages’ Use in School) vodūšais partners ir Frizu akademeja Niderlandē, bet Rēzeknis Tehnologeju akademeja īsasaistejuse kai sadarbeibys partners, kurs struodoj ar latgalīšu volūdu. Projektā puorstuovātys ari rītumfrīzu, mirandīšu i dīnavydsamu volūdys.

Vysu projekta sadarbeibys partneru mierkis ir sataiseit atbylstūšu informativu materialu par Eiropys apdraudātajom volūdom, ruodeit ceļus (pīeejis), kai saturu par taidom volūdom īkļaut atškireigūs vuiceibu kontekstūs i paleidzēt ideņtificēt vajadzeibys napīteikamu resursu volūdom. Teik taiseita e-apvuiceibys platforma, kurā byus īkļauts praktiskys ceļveds i digitali reiki volūdu vuiceišonai. Kotrai volūdai byus sova leluo nūdaļa, kai ari tiks veiduotys kūpeigys nūdalis, kab paruodeitu Eiropys kontekstu – lai školāni, kurī vuicās ari latgaliski, radz, ka i cytuos vaļstīs ir taidys mozuok lītuotuos, apdrautātuos volūdys. Ar apdraudātajom volūdom teik saprastys taidys, kuru saglobuošonu i atteisteibu navar skaiteit par pošsaprūtamu, pi taidu pīskaita ari latgalīšu volūdu.

Školuotuoji i cyti latgalīšu volūdys vuiceituoji aicynuoti aizpiļdeit anketu par volūdys vuiceišonu, kai ari vīnkuorši latgalīšu volūdys lītuojumu personeigajā pīredzē. Itys Rēzeknis Tehnologeju akademejai paleidzēs saprast, kas jau teik izmontuots latgalīšu volūdys vuiceišonai, bet vēļ vaira – kuo datryukst. Taišni itai daļai par vālamū situaceju, kuo itūšaļt datryukst, ir cīši lela nūzeime, kab sataiseitu piec īspiejis lobuoku vuiceibu leidzekli. Anketu vālams aizpiļdeit da vaļsts svātku, 18. novembra, tuos aizpiļdeišona var aizjimt nu 10 da 15 minutu. Anketa sataiseita latgaliski, bet aizpiļdeit var sev ārtuokā variantā – latgalīšu rokstu voi latvīšu literarajā volūdā. Aptauja daīmama ITE.

Itei aptauja paleidzēs apkūpuot vajadzeiguos funkcejis e-apvuiceibys platformai,  tryukstūšūs vuiceibu resursus latgalīšu volūdā i gataveibys leimini pīlāguot i veiduot lokala satura vuiceibu programys. Aptauju veidoj slāgti i atvārti vaicuojumi i atseviški apgolvuojumi. Vysys atbiļdis ir diskretys i anonimys i izmontojamys tikai pietnīcyskim mierkim.

Stuostūt par tuoļuokū projekta nūtikšonu i rezultatim, Sanita Martena soka: “Vysu nūdaļu par latgalīšu volūdu mums ir juosataisa 2023. gods laikā. Nūdaļa byus nu vairuoku apakšnūdaļu, nu kuru pyrmū plāns pabeigt martā, kab jau apreļa suokumā, kod Rēzeknē byus projekta seminars i gaideisim gostūs sadarbeibys partnerus nu cytu vaļstu, kūpā varātu pasadaleit pīredzē i vērtīs, kū školuotuoji i školāni soka par izstruoduotū apakšnūdaļu – kas ir labi, pi kuo vēļ vajadzēs struoduot.”

Vaira informacejis par projektu ite https://owlplus.eu/.