Rokstu sagataveja: portals lakuga.lv

Rēzeknis nūvoda Bieržgaļa pogosts atsarūn pa vydu div azaru – Mycānu i Meirānu. Pošā Bieržgaļa centrā ir pogosta kulturys noms, kur daļa nu telpu atvālātys ari Ontona Rupaiņa muzejam. Dūmys par muzeja izveidi roduos vēļ 1987. godā, kod tyka apbraukuotys pogosta vīnsātys i apvaicuoti vītejī dzeivuotuoji, meklejūt muzejiskus prīškmatus kruojuma izveidei. Muzejs apmaklātuojim palyka pīejams 1988. gods 11. novembrī, vystik oficials dybynuošonys datums ir 1990. gods 21. septembris. Itūmienes muzejā atkluots atvārtais kruojums.

Bieržgaļa Ontona Rupaiņa muzeja apmaklātuojim niu ir vareiba īsavērt ari atkluotajā kruojumā. Kai stuosta muzeja vadeituoja Skaidreite Apeināne, ideja veiduot atkluotū kruojumu rodusēs pyrma div godu. Niu atkluotais kruojums ir gotovs, i sevkurs apmaklātuojs ir aicynuots tymā īsavērt. Projekts realizāts ar Vaļsts Kulturkapitala fonda atbolstu.

“Iz reizis beja skaidrys, ka atkluotajā kruojumā byutu juogloboj Ontona Kūkuoja pasteļu cyklys “Ontona Rupaiņa zeme”, kū Ontons Kūkuojs 2003. godā duovynuoja Bieržgaļa pogosta muzejam. Asūšajuos kruojuma paleigtelpuos mikroklimats nabeja pīmāruots trauslūs pasteļa gleznu uzglobuošonai,” paskaidroj Skaidreite Apeināne.

Jei ari paturpynoj, ka pādejūs godūs muzejā ir tykuši vairuoki nūzeimeigi prīškmati, kurim nabeja vareibys atvielēt vītu asūšajā ekspozicejā. Vīns nu taidu prīškmatu ir nūvodnīka Arkadeja Svecis Sidnejis Olimpiskūs spēļu parada kostims. Sovu karjeru Arkadejs suoka kai ritiņbrauciejs, tok piečuok palyka par velomehaniki. Jis bejs velomehaniks kai PSRS izlasē, tai profesionalajā sportā i pīsadalejs kai velomehaniks sešuos olimpiskajuos spielēs. Muzeja eipašumā tyka ari cyti prīškmati, pīmāram, sporta školuotuoja Meikula Dekšņa pīminis lītys.

“Te ir juo gondreiž voi legendaruos sviļpis, ar kurom suoktys naskaitomys sporta stuņdis i tīsuotys saceņseibys. Meikuls Deksnis ari raudzeja atteisteit Bieržgalī zīmys uora sporta veidus, kai slēpuošonu i uotrsliduošonu, deļtam kruojumā izvītuotys ari uotrsliduošonys slidys, ar kurom vītejī bieržgalīši startēja daudzuos saceņseibuos i dabuoja lobus panuokumus ari republikys mārūgā,” stuosta muzeja vadeituoja Skaidreite Apeināne.

Atkluotuo kruojuma īkuortuošonā paleidzeiba lyugta kolegim nu Latgolys Kulturviesturis muzeja, deļtam paļdis juosoka tuo Muokslys nūdalis vadeituojai Inesei Dundurei, kura ar sovom praktikantem izstruoduoja atkluotuo kruojuma telpys skici.

Cytastorpā, Bieržgaļa pogosta muzeja pamatekspoziceja ir “Ontona Rupaiņa ustoba”, kur var izzynuot na viņ par Ontonu Rupaini, tok ari par Bieržgaļa pogosta viesturi. Taipoš muzejs pīduovoj ekskursejis pa Bieržgali, kas īkļaun muzeju, bazneicu, muižu i cytus svareiguokūs objektus. Kab papyldynuot aktivitašu kluostu, ir izveiduots ari pužļu cyklys “Ontona Rupaiņa zeme”. Taipoš ir izstruoduotys treis muzejpedagogiskuos programys “Kas ir babys pyura skreinī”, “Spieļuosim teatri” par Bieržgaļa pogosta tradicejom, kur ari poši dalinīki var koč cik paraudzeit teatra muokslu. Trešuo programa ir saisteita ar nūvodvuiceibu i saucās “Bieržgaļa stuosti”.

Sovpus pavysam natuoli Leņdžu pogosta Pūriskūs ir vareiba īpasazeit ar Ontona Rupaiņa dzymtū sātu, kuru breineigā kuorteibā uztur Ontona vacuokuo bruoļa Jezupa jaunuokuo meita Genovefa Rupaine.